Nano (mitolojia)

De Vicipedia
Jump to navigation Jump to search
Neva Blanca e la sete Nanos, un desinia de Mjallhvit (1852), un tradui islansce de la nara par la frates Grimm

En mitolojia germanica, un nano es un vivente umanin cual abita en montanias e en la tera, e es asosiada variosa con sajia, forja, mina, e fabrica. Nanos en folclor es comun descriveda como omes vea con barbas longa. Nanos fema no es multe notada. Nanos es a veses descriveda como corta e fea, ma alga studiantes vide esta como un developa moderna veninte de representas comica. Nanos continua es representada en cultur popular moderna en medias variosa.

La linguas germanica usa ia nomes orijinal simil a la engles dwarf, cual desende de dweorg en engles vea. Lo ave conatas en otra linguas germanica, incluinte dvergr en norsce vea e twerg en deutx alta vea. Un orijina sujestada es *dwergaz de protogermanica reconstruida. La parola "nano" en lfn es de la linguas romanica, como italian nano, espaniol enano, portuges anão, catalan nan, e franses nain, e los deriva de latina nanus, e ultima elinica νάνος - tota con la sinifia "nano".

No multe viventes definida clar como nanos apare en la Edda poesial e la Edda prosal. Cuando los apare, los ave roles diversa: fabricores de cosas con cualias majial, donores reservada de esta cosas, matores o predores sesal ci desira divas o elfos. Los es xef asosiada con forjores de metales, e ance con moria. En la nara de Re Sveiðir en la saga Ynglinga, la portes en la montes cual es gardada par la nanos pote es videda como portes entre mundos supranatural. Un nano, Alviss, ia demanda sposi con Þrúðr, la fia de Thor, ma el ia es mantenida como parlante asta la dia nova, e el cambia a petra (simil a alga naras de troles).

En la poesias eroin de deutx alta media, la plu de nanos es mostrada con barbas longa, ma algas pote ave un apare enfantin. En alga naras, la nano ave la cualias de un cavalor. El es clar separada de umanas normal par sua corpo peti, en alga casos no plu alta de la jenos de umanas normal. An si los es peti, nanos ave tipal fortia supraumana, par natur o par majia. Multe nanos ave la capasia per deveni nonvidable, tipal par usa un tarnkappe (un capa de nonvidablia), cual lo pare es un cualia multe vea de la nanos. Ance, los posese otra cosas majial, e comun es forjores mestral. Tipal, los abita en montes vacuida, ma en alga casos los pote abita supra la tera. Dependente de la nara, los pote es enemin o amin a umanas. La nanos mas es comun representada como desira femes umana, e nanos fema como desira la eroe mas en la lejendas.

En la fable de Neva Blanca de la frates Grimm, on ave sete nanos. La filma animada de esta nara, creada par la Walt Disney Compania en 1937, es la varia la plu bon conoseda en la eda moderna. Ma la plu de nanos en naras de imajina segue prosima los de J. R. R. Tolkien e sua obra "La senior de la anelos", do la nanos ia es distinguida de la elfos e ave cualias plu simil a la nanos de la mitos, an si ancora plu peti ca umanas e, multe comun, portante barbas grande. La plu de media fantasial moderna ia continua usa la idea, en la jua Dungeons and Dragons ("Prisones sutera e dragones" e libros e filmas como la Chronicles of Narnia ("Raconta de Narnia") par C. S. Lewis.