Mosca
Moscas es insetos con un duple de alas funsional per vola e un duple de alas posterior vestijial nomida halteres per eculibra. Los es clasida como la ordina diptera, de la elinica di- (du) e pteron (alas). La ordina es divideda entra du suordinas con sirca 110 familias entre los. La familias conteni un milion spesies nomida, estimada, incluinte la mosca de casa, tabana, tipula, e sirfido, an si sola 125,000 spesies ave un descrive publicada. La fosiles la plu temprana es de la triasica, sirca 240 milion anios ante aora. Analise filojenetical sujeste ce moscas ia orijina en la permian, sirca 260 milion anios ante aora.
Moscas ave un testo movable, con un duple de oios composada e grande, e bocas desiniada per perfora e suca (moscitos, moscas negra, asilido) o per leca e suca en otra grupos. Moscas ave sola un duple de alas per vola, ma sua ordina dona un capasia per manobra estracomun. La alas posterior ia evolui a organos mecanosensal spesial, cual ata como sensadores per move rapida jirante, e permete airojinastica avansada. Garas e cuxinetas sur sua pedes permete ce los adere a surfases lisa.
La sicle de vive de moscas es composada de la ovos, larvas, pupas, e adultes. Moscas traversa muta completa. La ovos es poneda sur alga cosa cual furni nuri per la larva, e la larva (cual no ave gamas) developa en un ambiente protejeda, comun en sua comeda. La pupa en la moscas plu avansada es un capsula dur de cual la adulte emerji cuando preparada. Moscas ave vives corta. Per esemplo, la mosca de casa adulte vive per sirca un mense, la efemera per sirca un anio. La fonte de nuri per moscas adulte es comeda licuidida, incluinte netar.
Moscas es multe importante ecolojial e per umanas. Los es polenadores importante, du sola a la abeas e sua relatas. Los ia poleni prima en la triasica. Moscitos porta malaria, denge, febre de Nil ueste, febre jala, ensefalite, e otra maladias infetosa. Moscas de casa, coabitante con umanas tra la mundo, sperde maladias par comedas. Moscas pote es iritante, spesial en cuantias grande, e spesial si los morde. Moscas grande como tsetses e moscas de carne feri bestias a un grado cual afeta la economia. Alga larvas es usada per pexa, como comedas per animales carnivor, e en medica per desbridi e limpi feris. Moscas de fruta (drosofilas) es usada como organismes model en rexerca. En cultur, moscas pote apare en obras de leteratur, sinema, musica, e relijio.