Triasica

De Vicipedia
Jump to navigation Jump to search
Un reconstrui de la Tera en la triasica de 230 milion anios ante aora

La triasica es un sistem e periodo jeolojial cual estende 50.6 milion anios de la fini de periodo permian (251.9 milion anios ante aora) a la comensa de la jurasica (201.3 milion aa) La triasica es la periodo prima e la plu corta de la era mesozoica. La comensa e la fini de la periodo es marcada par avenis major de estingui.

La triasica ia comensa seguente la aveni permian-triasica de estingui, cual ia povri sever la biosfera de Tera; lo no ia recovre asta la media de la triasica. Terapsidos e arcosauros ia es la vertebratos teran xef en esta periodo. Un sugrupo spesialida de arcosauros, nomida dinosauros, ia apare prima en la triasica tarda, ma no ia deveni dominante asta la periodo jurasica seguente.

La mamales vera prima, un sugrupo spesialida de terapsidos, ia evolui ance en esta periodo, e la vertebratos volante prima, la pterosauros, ci, como la dinosauros, ia es un sugrupo spesialida de arcosauros. La supracontinente vasta de Pangea ia esiste asta la triasica media, pos cual lo ia comensa fende gradal entre du supracontinentes separada - Laurasia a la norde e Gonduana a la sude.

La clima global en la triasica ia es xef calda e seca, con desertos estendente tra la plu de la interna de Pangea. La clima ia cambia e deveni plu umida en cuando Pangea ia comensa separa. La fini de la periodo ia es marcada par un otra estingui major, la aveni triasica-jurasica de estingui, cual ia mata multe grupos e ia permete ce dinosauros ateni domina en la jurasica.

La triasica ia es nomida en 1834 par Friedrich von Alberti, per la tre stratos de roca cual es trovada tra Europa norde-ueste: letos roja, covreda par calcario maral, segueda par un serie de fango e arenito, pd "la trias".

En la triasica, cuasi tota de la area de Tera ia es consentrada en un supracontinente singular, sentrida prosima a la ecuator, e estendente de polo a polo, nomida Pangea. La la este, longo la ecuator, la Mar Tetis ia penetra Pangea, cual ia causa la Mar Paleo-Tetis deveni cluida.

Plu tarda en la Triasica media, un mar simil ia penetra longo la ecuator de la ueste. La costas restante es ensircada par la mar mundal nomida la Pantalasia. Tota depones de mar profonda de la triasica ia desapare par la sudui de la platos maral.

La interna de la continente triasica ia ave un clima jeneral calda e seca. On ave no confirmas de glasias a o prosima a ambos polos. Vera, la rejiones polal ia es umida e temperada, e un clima bon per forestas e vertebratos, incluinte retiles. La grandia de Pangea ia limita la efeto moderante de la mar global; sua clima continental ia es multe saisonal, con estates multe calda e invernos multe fria. La contrasta entre Pangea e Pantalasia ia stimula monsones tra-ecuatoral multe forte. An si la triasica ia es xef un periodo seca, indicas esiste ce esta ia es interompeda par alga episodios de pluve creseda en la latitudes tropical e sutropical de la mar e sua tera ensircante.

La plu de familias de pexes no ia survive la estingui permian. Multe retiles maral ia flori, incluinte la sauropterijios, placadontos, e la plesiosauros prima. La talatosaurios e ictiosauros ia flori, e algas deveni multe grande en la triasica tarda. La lagos e rios ia es poplada par la dipnos (pexes con pulmones).

Xasores de la mares triasica

Un de la grupos la plu grande de amfibios - la temnospondilos - ia continua flori, ma xef en ambientes acual. La plu grande de estas ia es la mastodonsauros, ci ia crese asta 4 metres.

Rincosuaros, erbivores porcin, ia es comun en la triasica e ia domina multe ecosistemes. Los deveni estinguida sirca 220 milion anios a ante. Fitosauros ia ance flori en a triasica tarda. Los sembla crocodiles e probable ia ave un stilo de vive simil. Etosauros ia es erbivores pesa blindada comun en la triasica tarda, ma ia es estinguida en la estingui triasica-jurasica. Rauisucios ia es la xasores xef de la plu de ecosistemes de la triasica. Plu ca 25 spesies ia es trovada, incluinte cuatropedes grande, bipedes rapida, e bestias con velas sur sua dorsos. Ance, la tortugas ia apare en la triasica.

La dinosauros cual ia evolui prima en la triasica no ia evolui a sua grandias jigante asta la jurasica. La plu de la triasica ia es sola sirca 1 a 2 m de longia e ia xasa predas peti en la ombra de la jigante rauisucios. Sinodontos, un grupo grande cual ia inclui mamales vera, ia evolui prima en la permian, ma multe grupos ia flori en la triasica. Sua cualias ia inclui capeles, un serebro grande, e un posa vertical. Multe ia es peti, ma ance ia es jigante e ia pleni la nix erbivor ante la evolui de la dinosauros sauropodomorfio, e la nix de carnivores grande.

En la triasica, la arcosauros ia despone jeneral la terapsidos como la grupos dominante. Ma esta ia pote contribui a la evolui de mamales par forsa la terapsidos survivente e sua mamaliaformos desendentes a vives como insetivores peti e noturna. Vive noturna fria ia forsa ce la mamaliaformos ia developa pelos e un metaboli plu rapida, cual aida la estende de la mamales en la edas seguente.