Malaria

De Vicipedia
soldatos con malaria en un ospital de campo a Guadalcanal, otobre 1942

Malaria es un maladia infetante portada par moscitos cual afeta umanas e otra animales, causada par microbios parasital de un selula parteninte a la grupo plasmodio. Malara causa sintomes cual tipal inclui febre, fatiga, vomita, e dole de testa. En casos sever lo pote causa pel jala, atacas neural, como, o moria. Sintomes tipal comensa des a 15 dias pos es mordeda par un moscito infetada. Si no tratada coreta, persones pote ave revenis de la maladia a menses plu tarde. En los ci ia survive resente un infeta, reinfeta tipal causa sintomes plu debil. Esta resista partal desapare en menses a anios si la person no ave esposa continual a malaria.

La maladia es la plu comun transmeteda par un moscito fema de la spesies Anofeles. La morde introdui la parasitos de la saliva de la moscito en la sangue de la person. La parasitos vade a la figato do los matura e reprodui. Malaria es tipal diagnoseda par la esamina par microscopio de la sangue o par probas rapida fundida sur antijenes.

La risca de maladia pote es reduida par preveni mordes par moscitos par la usa de redes contra moscitos e insetisides, o con metodos de controla moscitos como la jeta de insetisides e la dreni de acua staniante. Alga medisines es otenable per preveni malaria en viajores cual vade a areas do la maladia es comun. La trata recomendeda per malaria es un combina de medisines antimalarial cual inclui artemisinin. Otra medisines es ance usada. Lo ta es la plu bon si la maladia es sertida ante trata car la usa tro frecuente pote crese la resista de la parasitos a la medisines.

Malaria es sperdeda vasta en la rejiones tropical e sutropical cual esiste en un banda sirca la ecuator, incluinte la plu de Africa susaharan, Asia sude, America Sude, e America sentral. En 2016, on ave sirca 216 milion casos tra la mundo, cual resulta en sirca 445,000 a 731,000 morias. Sirca 90% de casos e morias ia aveni en Africa. Malaria es comun asosiada con povria.