Linguas songai
La linguas songai es un grupo de linguas o dialetos prosima relatada e sentrida a la estende media de la Rio Nijer en la paises de Africa ueste Mali, Nijer, Benin, Burcina Faso, e Nijeria. Spesial, los es parlada en la sites de Timbuctu e Gao. Los ia es usada vasta como un lingua franca en acel rejion de la eda de la Impero Songai. En Mali, la governa ia adotada ofisial la dialeto de Gao (este de Timbuktu) como la dialeto per usa en educa prima.
Alga de la linguas songai no es multe intercomprendable. Ma songai, zarma, e dendi es multe intercomprendable en Nijer.
La linguas (areas mostrada a supra) e sua persento de tota parlores, es:
- Zarma & Songhoyboro Ciine (77.3%) (rosa oscura, la area de Niamei)
- Coiraboro seni (9.3%) (roja, este de Timbuctu, ueste e este de Gao)
- Dendi (5.5%) (rosa lejera, Benin norde)
- Koira txini (4.3%) (verde oscura, ueste de Timbuctu)
- Tadacsahac (2.2%) (verde, Mali sude-este)
- Otras (1.4%)
- Corandje (verde negrin, en Jazair norde)
- Tasauac (verde lejera, sirca Ingal en Nijer)
- Tagdal (verde blancin, la borda entre Nijer e Mali)
- Tondi songuai cini (roja negra, ueste de Hombori)
- Humburi seni (purpur, la rejion sirca Hombori)
Per linguistes, un punto de multe interese en esta linguas ia es la difisilia de determina sua asosia jenetical; los es comun videda como pare de la familia de linguas nilo-saharan, como definada par Joseph Greenberg en 1963, ma esta clasi es ancora controversal. Otras vide lo como un familia autonom de linguas.
Istorial, la nom songai ia es no videda como un nom propre etnical o linguistical, ma la nom de la caste renante de la Impero Songai. Su la influe de la usa de franses, parlores en Mali ia comensa usa songai como un nom etnical; ma otra parlores usa otra nomes, como zarma o isauagen.
Alga poesias e leteras en songai scriveda ante la periodo colonial, scriveda en la alfabeta arabi, esiste en Timbuctu. Oji, songai es scriveda en la alfabeta latina.
La linguas songai es tipal un grupo de linguas con tonos e la ordina SOV, con la eseta de koira txini de Timbuctu, cual es nontonal e usa la ordina SVO.