Linguas construida par J. R. R. Tolkien

De Vicipedia
Jump to navigation Jump to search
La poesia Namarie, en la lingua quenya e la scrive tengwar

La autor e filolojiste J. R. R. Tolkien ia crea un cuantia de linguas, incluinte linguas desiniada per poplas en sua naras. La inventa de linguas (nomida "glosopoiese par Tolkien, de elinica γλῶσσα glôssa, "lingua" e ποιῶ poiô, "crea", paralel con sua idea de "mitopoiese", la crea de mitos) ia es un ocupa de sua vive intera, comensante en sua adolese. Un atenta temprana par Tolkien ia es la reconstrui de un lingua germanica vea e nonrejistrada cual ia pote es parlada par la popla de Beowulf en la eda eroin germanica.

La projeta la plu developada par Tolkien ia es sua linguas elfica. El ia comensa construi un lingua elfica en sirca 1910-1911 cuando el ia es la la Scola de Re Edward en Birmingham, England. Plu tarda, el ia nomi el quenya (sirca 1915) e el ia continua developa la istoria e la gramatica de sua linguas elfica asta sua mori en 1973.

En 1931, e ia presenta un leson sur sua pasion per linguas construida, titulida A secret vice ("Un vilia secreta"). Ala, el contrasta sua projeta de linguas artal construida per la plaser estetica, con la pragmatisme de linguas aidante internasional. La leson ance ia discute sua vistas sur fonestetica, indicante elinica, suomi, e cimri como esemplos de "linguas cual ave un formas de parolas multe marcante e, en su modos diferente, bela".

La glosopoiese de Tolkien ave du dimensiones en tempo: la linia de tempo interna (naral) de avenis descriveda en la Silmarillion e otra scrives, e la linia de tempo esterna de sua propre vive, en cual el ia revisa e refina frecuente sua linguas e la istoria naral.

Inspiras e comensas[edita | edita la fonte]

Tolkien ia es un filolojiste profesal de linguas germanica antica, spesiali en engles antica. El ia es ance interesada en multe linguas estra sua campo, e ia developa un ama spesial per la lingua suomi. El ia descrive la trova de un libro gramatical de suomi como "descovrente un cava de vino completa, plenida con botelas de un vino stonante de un tipo e sabor nunca probada a ante".

Cuando el ia ave 13 anios, el aida construi un sifra de sustitui de sonas nomida nevbosh, "asurda nova", cual crese per inclui ala elementos de un lingua inventada. Notable, Tolkien ia nota ce esta no ia es su atenta prima a linguas inventada. Pronto pos, el ia developa un lingua vera inventada nomida naffarin, cual ia conteni elementos cual va survive a sua linguas plu tarda, sur cual el ia continua labora asta sua mori plu ca 65 anios plu tarda. La inventa de linguas ia es sempre liada prosima a sua mitolojia, car el ia trova ce un lingua no pote es completa sin un istoria de la popla ci parla lo, en la mesma modo ce esta popla no pote es plen real si sola imajinada sola tra engles e como parlante engles. Tolkien, donce, ia pensa de se mesma como un traduor e ajustor plu ca un autor orijinal de sua obras.

Linguas e mitos[edita | edita la fonte]

Tolkien ia ave la opina ce la inventa de un lingua artal per es convinsente e plasente debe inclui no sola la developa istorial de la lingua, ma ance la istoria de sua parlores, e spesial la mitolojia asosiada con e la lingua e la parlores. Esta idea ce un lingua elfica debe es asosiada con un istoria e mitolojia complicada de la elfos ia es a la cor de la developa de la obras de Tolkien.

Tolkien ia scrive en un de sua leteras: "cual me pensa es un fato xef sur me labora e ce lo es tota de un peso, e fundal lingual en inspira... Lo no es un 'pasatempo' en la sinifia de alga cosa diferente de sua labora, prendeda como un modo de relasa. La inventa de linguas es la funda. La "naras" ia es fabricada per furni un mundo per la linguas, e no la reversa. Per me, un nom aveni prima e la nara segue. Me ta prefere scrive en 'elfica'. Ma, serta, tal obra como la Senior de la anelos ia es editada, e sola tan multe 'lingua' ia es restada en lo como me ia pensa ta es asetada par lejores. (Me ia descovre aora ce multe ia ta gusta plu.)... Per me, en cualce caso, lo es xef un esajo en 'estetica lingual', como me ia dise a veses a persones ci demanda de me 'cual lo es sur'."

En cuando la linguas elfica ia resta a la sentro de sua atende, la nesesas de la naras asosiada con Tera Media ia nesesa ance la developa a min surfasal de la linguas de otra razas, spesial de la nanas e la umanas, ma ance la parla negra desiniada par Sauron, la antagoniste xef en la Senior de la anelos. Esta lingua ia es desiniada per es un antitese de la idea de un lingua estetical como quenya. La parla negra ia representa un parodia contrautopial de un lingua aidante internasional, como la rena par Sauron de la orcos es un parodia contrautopial de un stato autocrata.

Linguas elfica[edita | edita la fonte]

La familia de linguas elfica es un grupo de linguas relatada par desende de un asendente comun. Sindarin e quenya es la linguas la plu famosa e la plu developada, ma los no es la sola. El ia construi la gramatica e vocabulo de a min 15 linguas e dialetos:

1910 - 1915: Quendian primitiva (la protolingua), eldarin comun, quenya, e godogrin.

1935 - 1955: Goldorin ia cambia sinifiante e deveni alora noldorin; telerin, ilkoin, doriathrin, e avarin junta lo.

Plu tarda: ilkorin e doriathrin ia es descontinuada. Noldorin ia maturi a Sindarin.

En 1937, el ia scrive la Lhammas, un esajo sur tota la linguas de Tera Media, desemblada como scriveda orijinal par un elfo Pengolodh, cual ia es ance sujesteda como la fonte de la naras en la Silmarillion. La tese major es ce la linguas de Tera Media ia es tota desendeda de la lingua de la Valar (la "dios") nomida valarin e divideda entre tre ramos:

Oromëan, nomida per Oromë, ci ia ensenia la elfos per parla. Tota linguas de la elfos e la plu de linguas umana es derivada de oromëan.

Auëan, nomida per Aulë, la creor de la nanas, es la orijina de la lingua khuzdul, cual ia ave alga influe sur la linguas umana.

Melkian, nomida per la dio rebelante Melkor (o Morgoth), es la orijina de la multe linguas parlada par la orcos e otra viventes mal (ma no relatada a la lingua negra creada par Sauron).

En scrive la Senior de la Anelos en la desinia de 1950, Tolkien ia usa la finje leteratural de alega ce westron ia es representada par engles. El ia continua orijinal par usa engles antica per la lingua de Rohan, norsce vea per la lingua de Dale, e goto per la lingua de Rhovanion, e nomes en cimri vea per la nomes de algas de la hobbites. Umanas ia parla linguas como haladin, dunlendish, drûg, haradrim, e easterling. Ma, seguente Tolkien, la plu de popla de la paises ueste ia parla westron, como un lingua franca.

Pos la Gera Mundal 2, Tolkien ia crea la lingua adûnaic (o númenórean). Lo ia es intendeda per es la lingua de cual westron (acc adûni) ia deriva.

Alfabetas[edita | edita la fonte]

Tolkien ia es un caligrafiste capas, e ia inventada no sola lingua ma ance scrives (en ordina de tempo):

La tengwar de Rúmil o Sarati
La runas Gondolinic
La scrive Valmaric
Andyoqenya
Qenyatic
La alfabeta Engles Nova (un alfabeta cuasi fonemal)
La alfabeta de la Goblines (en la Father Christmas Letters)
La tengwar de Fëanor
La cirth de Daeron