Tera Media
Tera Media es la loca naral de la plu de la obras mitolojial de la scrivor engles J. R. R. Tolkien. La espresa es simil a Midgard de mitos norsce, descrivente la mundo abitada par umanas, la continente sentral de Tera en la pasada imajinada par Tolkien. La obras la plu lejeda de Tolkien - la Hobbit e la Lord of the Rings ("Senior de la anelos") aveni intera en Middle Earth (Tera Media), e la espresa ia deveni un modo per refere a la mundo naral e la obras intera de Tolkien.
En sua naras, Tolkien ia tradui la nom "Tera Media" como Endor e Ennor en la linguas de la elfos, quenya e sindarin, a veses referente sola a la continente sur cual la naras aveni, con un otra continente sude nomida la "Tera Oscur" e un plu continente ultra Rhûn, la mar este. Ultra la mar ueste Belegaer es Aman, la abitada de la divines - la Valar - e un tribu de elfos nomida la eldar. Tera Media es, donce, la continente norde de Arda (Tera) en un eda imajina de la pasada de nosa mundo. Esta pasada, nomida la Eda Tre, ia es poneda a sirca 6000 anios ante aora, como un "realia du" o "su-creada".
La naras foco la plu sur la partes norde-este de la continente. Esta parte de Tera Media recorda Europa de la eda medieval, e la ambie de la Shire (la contia de la hobbites) recordante England, e plu esata la Midlandes Ueste, con Hobbiton a la mesma latitude como Oxford.
