Goto

De Vicipedia
Jump to navigation Jump to search
La sarcofago Ludovisi Grande de la sentenio tre, mostra un batalia entre la gotos e la romanes

La gotos (goto: Gut-þiuda, latina: Gothi, elinica: Γότθοι (Gótthoi)) ia es un popla germanica este, de ci du ramos, la visigotos e la ostrogotos, ia ave un rol importante en la cade de la Impero Roman Ueste tra un serie longa de geras e en la emerji de Europa medieval. La gotos ia domina un area vasta, cual a la plu grande su la re germanica Ermanaric e sua visre Athanaric estendeda de la Rio Danubio a la Rio Don, e de la Mar Negra a la Mar Baltica.

La gotos ia parla la lingua goto, un de la linguas germanica este estinguida. Lo ia es parlada final en Crimea en la sentenio 18 par la gotos crimean. En la lingua goto de Italia de la ostrogotos, los ia nomi se Gut-þiuda ("la popla goto").

A alga tempo sirca la sentenio un ec, popla germanica ia migra de Scandinavia a Gothiscandza, en Polsca moderne. Los ia continua a sude e este e, cuando los ia ariva a la stepe norde de la Mar Negra, la tribus ia adota la modo de vive de la nomadas eurasian. La referes prima de la gotos par la elinicas ia nomi los "scitianes", car esta area ia es ocupada istorial par la popla (nonrelatada a la gotos) con esta nom.

La invade prima en la Impero Roman cual es clar atribuida a la gotos es la saca de Histria en 238. Plu atacas segueda en la desenios a pos. En la batalia de Naissus (268), Aurelian, ci ia es cargada con tota cavalores roman entre la rena de Claudio, ia gida los contra un atenta par la gotos per entra Italia. Alga survivores ia es donada ambita en la impero, cuando otra ia es corporada en la armada roman. Esta batalia ia serti la survive de la impero per un otra du sentenios.

En la sentenio cuatro, la gotos deveni plu e plu soldatas en la armadas de la romanes, contribuinte a la armada roman ia es cuasi intera germanica a acel tempo. La prefere par la gotos per porta la pelos de animales ia deveni un moda en Constantinopoli, un abitua forte denunsiada par la conservistes de la site.

En la sentenio cuatro, la gotos ia catura Dacia roman, e ia divideda en a min du grupos separada par la Rio Dniester: la Thervingi e la Greuthungi. Los ta deveni la visigotos, ci deveni federadas de la romanes, e la ostrogotos, ci deveni alias de la Hunes. A la fini de la sentenio cuatro, la Hunes ia controla tota la rejion cual ia es a ante controlada par la gotos.

Orijinal, la gotos ia es paganes. La gotos ia es par grados convertida a cristianisme arian en la sentenio cuatro, la resulta de la mision de la bispo goto Wulfila. Esta Wulfila ia crea la alfabeta goto per tradui la biblio, cual es la fonte xef de nosa informa sur la lingua goto.