Filosofia de Spinoza

De Vicipedia
Jump to navigation Jump to search
Un sculta de Spinoza en de Haag, Nederland
La sala de studia de Spinoza

Spinoza ia razona ce Dio esiste e el es astrata e nonpersonal. Sua idea de Dio es lo cual Charles Hartshorne ia descrive como panteisme clasical. Spinoza ia es ance descriveda como un materialiste epicuriste, spesial per sua oposa a la dualisme de mente e corpo de Descartes. Esta idea ia es ance cual la epicuristes proposa ante el, car los ia crede ce atomes, con sua vias probablosa ia es la sola sustantia cual esiste fundal. Ma Spinoza ia devia sinifial de la epicuristes par adere a un determinisme sever, plu como la stoicas antica, cual contrasta con la crede epicuriste en la via probablosa de atomes, e es plu simil a alga ideas de mecanica de cuantos de oji. La sistem de Spinoza ia dona ordina e unia a la tradision de pensa radical, ofrente armas potiosa per debata contra la autoria de relijio o tradision.

Spinoza ia razona ce tota cual esiste en natur (pd, tota cosa en la universo) es un sola realia (sustantia) e on ave sola un colie de regulas cual governa la realia completa, cual ensirca nos e de cual nos es un parte. Spinoza ia vide Dio e Natur (Deos sive Natura) como du nomes per la mesma realia, un sustantia singular e fundal. (Nota ce "sustantia" refere a "lo cual sta su tota realia" e no materia fisical en la sinifia moderne.) Tota otra esentes es sola modos e alteras de esta unia, e tota cosas es determinada par natur per esiste e causa efetos, e ce la cadena complicada de causa-e-efeta es comprendeda sola en parte. Sua proposa de la identia de Dio e Natur ia es esplicada plen en sua libro, publicada pos mori, la Etica. La major desacorda con la dualisme de Descartes es ce, si mente e corpo ia es vera distinguida, alora lo debe es clar como la du pote coordina con lunlotra en cualce modo. Umanas suposa ce los ave vole libre, el sujeste, cual es la resulta de sua consensa de la apetitos cual afeta sua mentes, en cuando los no es capas de comprende la razonas per cual los desira cual los desira, e ata como los ata.

Spinoza a sujeste ce Dio o Natur ave un infinitia de cualias o proprias, de cual la pensa e la estende (pd mente e corpo) es sola du. Sua descrive de la natur de realia alora pare como el trata la mundos fisical e mental como enterliada, causal relatada, e derivada de la mesma sustantial. Lo es importante per nota ce Spinoza ia descrive como la mente umana es afetada par ambos fatores mental e fisical. El ia disputa e nega la dualisme. La sustantia universal produi e corpo e mente. An si los es cualias diferente, on ave no difere fundal entre esta du aspetas. Esta teoria es un solve istorial sinifiosa per la problem de mente-e-corpo, un solve nomida monisme neutral. (Lo es importante ce on reconose ce, vera, el no sujeste ce la sustantia conteni la fisical e la mental, ma ce sustantia es fisical e mental, e multe plu. Monisme neutral es simil a la ideas de Spinoza, no la mesma. Lo ta es reviveda par la filosofiste e psicolojiste american, William James)

Per Spinoza, Dio no rena supra un universo par sua potia spirital par cual el pote cambia la prosedes de la universo. Ma Dio es la sistem deterministe de cual tota en natur es un parte. El ia razona ce cosas no pote es produida par Dio en cualce otra modo o en cualce otra ordina de lo cual es la caso. El ia disputa direta la idea de un Dio transendente cual responde a avenis en la universo. Tota cual ia aveni e va aveni es un parte de un cadena infinita de causa-e-efeto, cual a la nivel metafisical, umanas no pote cambia. No cuantia de prea o rituo pote influe Dio. Sola la bon sabe de Dio furni la responde la plu bon a la mundo. Dio o Natur no pote es afetada par alga otra cosa, car lo sujeste ce cualce cosa esiste estra Dio o Natur.

Spinoza es un deterministe completa ci ia crede ce tota sin eseta aveni par nesese. Per el, an la condui umana es completa determinada, con libria sola nosa noncapasia per sabe ce nos es determinada e per comprende perce nos ata como nos ata. Par developa ideas plu "sufisinte" sur nosa condui e nosa emosias, nos deveni la causa "sufisinte" de nosa efetos (interna o esterna), cual resulta en un crese de ativia e un redui de pasivia. Esta prosede permete ce nos deveni plu libre e plu como Dio. Ma Spinoza ance crede ce tota debe aveni como tota aveni, donce umanas no ave vole libre, an si nos crede forte ce nos ave lo. Nos es consensa de nosa desiras ma no consensa de la causas par cual nosa desiras es determinada.

Esta idea de la determinisme de Spinoza es luminada par esta sita famosa en la Etica: "la enfante crede ce lo es par vole libre ce el xerca la seno; la fio coler crede ce par vole libre el desira venja; la om timida crede ce lo xerca vole par sua vole libre; la enebriada crede ce par un comanda libre de sua mente, el dise la cosas cual, cuando sobre, el espera ce el ia resta nondiseda. … Tota crede ce los parla par un comanda libre de la mente, en cuando, vera, los ave no potia per restrinje la impulsa cual los ave per dise." Donce, per Spinoza, moralia e judi etical como un eleje es fundida sur un ilude. Per Spinoza "colpable" e "lodable" es ideales umana nonesistente, e sola comprendable en la mente car nos es tan abituada a la interliada de nosa persepi e nosa consensa ce nos ave un idea falsa de eleje.

La filosofia de Spinoza ave multe similes con stoicisme cuanto ambos filosofias ia xerca per pleni un rol terapial par instrui persones como on pote ateni felisia. Ma Spinoza difere de la stoicas en un modo importante: El ia rejeta completa la idea de la stoicas ce razona pote defeta emosia. Oposante, el ia dise ce un emosia pote es vinseda sola par un emosia plu forte. Per el, la distingui esensal ia es entre emosias ativa e pasiva: emosias ativa es los cual es comprendeda razonal, e la emosia pasiva no es comprendeda. El ia ance crede ce sabe de la causas vera de emosia pasiva pote cambia lo a un emosia ativa, e en esta modo Spinoza ia previde un de la ideas sentral de psicoanalise.

Spinoza ia comparti credes etical con la epicuristes antica, ci ia renunsia etica ultra la mundo material, an si epicuristes ia foca plu sur plasir fisical e Spinoza plu sur bonstate emosial. A la comensa de sua "Trata sur la boni de la comprende" (Tractatus de intellectus emendatione) es la cor de la filosofia de etica de Spinoza, lo cual el ia vide como la bonia vera e final. Spinoza ia crede ce bonia e malia es consetas relativa, e ia declara ca no cosa es esensal bon o mal, estra como relativa a un aveni spesifada. Cosas cual ia es tradisional videda como bon o mal ia es simple bon o mal per umanas. Spinoza ia crede ce la universo es determinada e "tota cosas en natura prosede de nesesa e con un perfeta completa." No cosa aveni par acaso en la mundo de Spinoza. En un mundo en cual "nesese" rena, bon e mal no ave un sinifia asoluta. La mundo como lo esiste pare nonperfeta sola car nosa persepi es multe limitada.

En la universo, cualce cosa cual aveni deriva de la natur esensal de ojetos, o de Dio o Natur. Seguente Spinoza, realia es "perfeta". Si situas es videda como nonfortunosa, lo es sola la resulta de nosa conseta nonsufisinte de realia. En cuando composantes de la cadena de causa e efeta no es ultra la comprende de razona umana, la capasia de umanas per comprende la intera infinital complicada es limitada car siensa no pote comprende la segue completa. Spinoza ia dise ance ce persepi par la sensas, an si pratical e usosa, no es sufisinte per descovre veria.

Conatus es la idea ce, "cada cosa, en se mesma, labora per conserve sua esiste", cual otra filosofistes ia nomi "la vole per vive" (e cual siensistes nomi "inertia"). Lo no es alga ativia en ajunta a otras; lo es la esense de tota ativia, de la cosa mesma. Lo es identical con "desira". Conatus, alora, es la radis de virtua. E, seguente Spinoza, la virtua la plu alta es la ama inteletal (pd desira per conose) de Dio e Natura.