Atom

De Vicipedia
Representa de un atom de elio.

Un atom es un unia composante de materia comun, e la composante la plu peti cual ave la cualias de un elemento cimical. Cada solida, licuida, gas e plasma es composada de atomes neutral o ionida. Atomes es pico; un grandia tipal es sirca 100 picometres (un des-mil-milioni de un metre).

Atomes es sufisinte peti ce atentas de predise sua condui par usa fisica clasica – como si los ta es bales de biliardo, per esemplo – dona predises notable noncoreta par causa de efetos cuantal. Tra la developa de fisica, modeles atomal ia adota prinsipes cuantal per esplica e predise plu bon la condui.

Cada atom es composada de un nucleo e un o plu eletrones liada a la nucleo. La nucleo es composada de un o plu protones e tipal un cuantia simil de neutrones. Protones e neutrones es nomida nucleones. Plu ca 99,94% de la masa de un atom es en la nucleo. La protones ave un carga eletrical positiva, la eletrones ave un carga eletrical negativa, e la neutrones ave no carga eletrical. Si la cuantias de protones e eletrones es egal, acel atom es eletrical neutral. Si un atom ave plu o min eletrones ca protones, alora lo ave un carga negativa (si plu) o positiva (si min), e on nomi lo un ion.

La eletrones de un atom es atraeda a la protones en un nucleo atomal par esta forte eletromagnetal. La protones e neutrones en la nucleo es atraeda a lunlotra par un otra forte, la forte nucleal, cual es usual plu forte ca la forte eletromagnetal cual repulsa la protones positiva cargada de lunlotra. En alga situas, la forte eletromagnetal repulsante deveni plu forte ca la forte nucleal, e nucleones pote es ejetada de la nucleo, tal ce un elemento diferente resta: la dejenera nucleal causa un muta nucleal.

La cuantia de protones en la nucleo defini la elemento a cual la atom parteni: per esemplo, tota atomes de cupre conteni 29 protones. La cuantia de neutrones defini la isotopo de la elemento. La cuantia de eletrones influe la cualias magnetal de un atom. Atomes pote lia a un o plu otra atomes par lias cimical per formi composada cimical como moleculas. La capasia de atomes per asosia e desasosia es la causa de la plu de la cambias fisical oservada en natur, e es lo cual on studia en la siensa cimica.