Fe

De Vicipedia
Jump to navigation Jump to search
"Prinse Artur e la Rena de Fes" par Johann Heinrich Füssli

Un fe es un tipo de esente de mitos o lejendes en la folclor european, un tipo de spirito, comun descriveda como metafisical o supranatural. Los es jeneral descriveda como simil a umanas en apare, ma con potias majial. Fes ia es imajinada como peti, de la grandia de un inseto a lo de un enfante umana. La grandia no ia es constante, ma es elejeda majial. Alga fes peti ia pote estende sua formas per imita umanas. Alas, an si comun en arte de la eda victorian e plu tarde (con alas de libelas o papilos), es rara en folclor. Lo ia es suposada ce fes vola par usa sua potias majial, o a veses montante sur la dorsos de avias o sur un talo de la erba de san Jacobo.

La idea de fes no deriva de un orijina singular, ma es un combina de elementos de un varia de cultures. En la folclor de Er, la aes sidhe ("popla peti") es un fonte. La elfos de Scandinavia ia ave ance un influe. Lo pote es videda como un tipo de demon, un spesie separada de umanas o un rasa vea de umanas. Un crede ia es ce fes es la spiritos de la mor, en alga casos relatada a la tumulos antica, e abita suteran. Alga studiantes de la sujeto sujeste ce fes es mores ci ia ave "vives noncompletada". Cuando cristiania ia ariva en Europa norde, la interpreta de fes ia cambia: Los ia es videda como anjeles rejetada par Dio, ma no sufisinte mal per inferno.

Un motif reaveninte de lejendes sur fes es la nesesia de teni a via la fes par la usa de fetixes encantada. Esemplos inclui la campanas de un eglesa, la porte de vestes eversada, la trefolia con cuatro folias, e comedas. Fes ia es ance videda como infestante locas spesifada, e como malgida viajores, usante focos fol. Ante la comensa de medisin moderne, fes ia es culpada per maladias, spesial per tuberculose e malformas a nase.

En ajunta a sua orijines folcloral, fes ia es un parte comun de leteratur de la Renase e arte romantica, e ia es spesial popular en Britan en la edas victorian e edwardian. La revive celtica ia resulta en fes como un parte spesial de la erita cultural.