Tuberculose

De Vicipedia
Enfantes en un ospitaleta per tuberculose

Tuberculose es un maladia infetante normal causada par la bateria micobaterio tuberculose. Tuberculose afeta jeneral la pulmones, ma lo pote ance afeta otra partes de la corpo. La plu infetas no ave sintomes, en cual caso lo es conoseda como tuberculose ascondeda. Sirca 10% de infetas ascondeda deveni maladias ativa cual, si no tratada, mata sirca dui de los infetada. La sintomes clasica de tuberculose ativa es un tose cronica con sputa sanguosa, febre, suo de note, e perde de peso. Infeta de otra organos pote causa un estende vasta de sintomes.

Tuberculose es sperdeda tra la aira cuando persones ci ave tuberculose ativa en sua pulmones tose, sputa, parla, o stornui. Persones con tuberculose ascondeda no sperde la maladia. Infetas ativa aveni plu comun en persones con VHI o SIDA e en los ci fuma. Diagnose de tuberculose ativa es fundida sur radiografes de la peto, e con cultiva e esamina de fluintes corpal par microscopios. Diagnose de tuberculose ascondeda depende de la proba de tuberculina o esamina de sangue.

Preveni tuberculose envolve la evalua de los con risca alta, deteta e trata temprana, e [[vasini con la vasin de basilo Calmette-Guérin (BCG) Los con risca alta incui los ci ave contata con persones con tuberculose ativa. Trata nesesa la usa de antimicrobios multiple tra un periodo longa. Resista a antimicrobios es un problem cresente, con frecuentias cresente de tuberculose resistante de drogas multiple (MDR-TB) e tuberculose resistante de drogas estendeda (XDR-TB).

Aora, un cuatri de la popla en la mundo es posible infetada con tuberculose. Infetas nova aveni en sirca 1% de la popla cada anio. En 2016, on ia ave plu ca 10 milion casos de tuberculose ativa, cual ia resulta en 1.3 milion moris. Esta fa ce lo es la causa prima de mori de maladias infetosa. Plu ca 95% de moris ia aveni en nasiones developante, e plu ca 50% en India, Xina, Indonesia, Pacistan, e Pilipinas. La cuantia de casos nova cada anio ia decrese pos 2000. Sirca 80% de persones en multe paises asian e african responde positiva a probas en cuando 5-10% de persones en la SUA. Tuberculose ia es presente en umanas de la edas antica.