Evolui de Umania

De Vicipedia
Jump to navigation Jump to search

La evolui de umania es un prosede cual ia resulta con la emerji de umania anatomial moderna. La studia de la evolui de umania inclui multe campos diversa, incluinte antropolojia fisical, primatolojia, arceolojia, paleontolojia, neurobiolojia, etolojia, linguistica, psicolojia evolual, embriolojia, e jenetica.

Studias jenetical indica ce la primates ia separa de otra mamales sirca 85 milion anios ante aora, en la periodo cretasica tarda, e la fosiles la plu temprana apare en la paleosene, sirca 55 milion anios ante aora. En la suprafamilia Hominoidea, la familia Hominidae ia diverje de la familia Hylobatidae (gibones) sirca 15 - 20 milion anios ante aora (aaa); la sufamilia Homininae (ominidos african) ia diverje de Ponginae (orangutanes) sirca 14 milion aaa; la tribu Hominini (incluinte umanas, australopitecos, e ximpanzes) diverje de la tribu Gorillini (gorilas) entre 8 - 9 aaa; e la 4 - 7 milion Hominina (umanas e asendentes estinguida) e Panina (ximpanzes) ia separa sirca 4 - 7 milion aaa

Un model de la filojenetica de H. sapiens en la paleolitica media; la ases orizonal representa locas jeografial; la ases vertical representa tempo en miles de anios aaa

La evolui de umania de sua separa prima de la asendente comun final de umanas e ximpanzes es marcada par alga cambias morfolojial, fisiolojial, de condui, e de developa. La ajustas la plu importante es bipedia, crese de la grandia de la serebro, jesta e enfantia estendeda, e min dimorfia sesal. Otra cambias inclui la evolui de un teni potiosa e esata, un cambia cual ia aveni prima en Homo erectus.

La representante prima documentida de la jenero Homo es Homo habilis, ci ia evolui sirca 2.8 milion aaa, e es posible la spesie la plu temprana per cual on ave confirma de la usa de utiles de petra. La serebros de esta spesie ia es aprosima la mesma grandia como los de ximpanzes, an si algas sujesta ce esta ia es la periodo en cual la jen SRGAP2 ia duplida, produinte un fili plu rapida de la cortex fronte, cual indica un mente plu simil a la nosa oji.

En la milion anios seguente, un prosede de ensefali rapida ia aveni, e con la ariva de Homo erectus e Homo ergaster en la arcivo de fosiles, la capasia cranial ia duple a 850 cm3. Lo es suposada ce Homo erectus e Homo ergaster ia es la spesies prima per usa foco e utiles complicada, e ia es la prima de la hominines cual parti de Africa, sperdente tra Africa, Asia, e Europa entre 1.3 a 1.8 milion aaa.

Homo neanderthalensis, la neandertal, ia abita en Europa e Asia de 400,000 a 28,000 aaa. On ave alga diferes anatomial clar entre umanas moderna e la neandertales. Alga de esta diferes relata a la ajusta superior a ambientes fria par la neandertales. Alga aplotipos de ADN con orijinas neandertal esiste en tota poplas nonafrican, e ce los (e otras de la denisovanes) ia contribui tan multe como 6% de la jenom de umanas moderna.

Homo floresiensis, ci vive de sirca 190,000 a 50,000 aaa, e nomida "la hobbit" per sua petia, posible la resulta de nanisme isolida. La hobbites ia comparti un asendente comun con umanas moderna, ma ia separa de los e segue un otra via de evolui. Un sceleto de un fem de 30 anios, trovada en 2003, ia es datida como 18,000 aaa, e ia es estimada como un metre de altia, con un volum serebral de 380 cm3 (cual es peti per un ximpanze, e min ca un tri de la promedia per umanas moderna de 1400 cm3).

Vias de migra de Homo sapiens

Homo sapiens antica, la presedente de umanas anatomial moderna, ia evolui en la paleolitica media entre 400,000 e 250,000 aaa. La move a condui moderna ia aveni con la developa de cultur de simboles, lingua, e la tecnolojia litica spesialida cual aveni sirca 50,000 aaa, seguente alga antropolojistes, ma otras sujesta ce un cambia de condui ia es gradal e ia aveni tra un periodo plu longa. Aora, Homo sapiens es la sola spesie survivente de sua jenero Homo.