Eosene

De Vicipedia
Jump to navigation Jump to search
La continentes e mares en la eosene
La mesonix, un mamal de la eosene cual sembla un lupo (ma no es relatada)
La basilosauro, un mamal relatada a moderna setaseos

La epoca eosene, de 56 a 34 milion anios a ante, es la epoca du de la periodo paleojen en la era senozoica. Lo estende de la fini de la epoca paleosene a la comensa de la epoca oligosene. La comensa de la eosene es marcada par un periodo corta en cual la consentra de carbon 13c en la atmosfera ia es multe basa comparada con la plu comun carbon 12c. La fini es marcada par la estingui major nomida "la rompe grande", cual pote es relatada con la colpa de alga bolides grande en Sibir e en la area de la Baia Chesapeake de oji.

La nom eosene derive de la parolas elinica antica eos (lus prima) e kainos ("nova", referente a la animales nova).

(Vide Scala de edas jeolojial per detalias)

A la comensa de la eosene, la temperatures alta e mares calda ia crea un ambiente umida e calda, con forestas sperdente tra la Tera de polo a polo. Esta la desertos la plu seca, Tera ia es covreda intera en forestas. Fosiles e resta conservada como sipreses e secuoias ia es trovada a Isola Ellesmere en Canada artica, e fosiles de arbores e plantas sutropical e an tropical ia es trovada en Gronland e Alaska.

Diminui de la temperatures ia comensa en la media de la epoca, e a la fini de la eosene, la internas de continentes ia comensa seci, con forestas deveni min densa. La erbas nova evoluida ia es ancora restrinjeda a rivas e plaias de lagos, e no ia deveni planos e savanas.

La clima fresca ia trae ance cambias de la saisones. Arbores caduca, cual es plu capas per ajusta a cambias grande de temperatur, ia comensa suprapasa la spesies sempreverde de la tropicos. A la fini de la epoca, forestas caduca covreda partes grande de la continentes norde, e la forestas pluvosa ia pote continua sola en America Sude, Africa, India, e Australia.

Antartica, cual ia comensa la epoca eosene con temperatures calda e forestas pluvosa, ia deveni plu fria, e a la fini de la epoca, la continente ia ave forestas caduca e areas vasta de tundra.

La fosiles la plu vea de la plu de la ordinas de mamales moderna ia apare en la eosene temprana. A la comensa, alga grupos nova de mamales ia ariva en America Norde. Esta mamales moderna, como artiodatilos, perisodatilos, e primates, ia ave gamas, pedes, e manos longa e spesa, capas de saisi, e dentes bon per rode. Tota membros de la ordinas nova de mamales ia es peti, su 10 kg, e (deduida de la grandia de dentes) los ia es sola 60% de la grandia de la mamales de la epoca paleosene cual presede los, e ance plu peti ca la mamales cual segue los.

Ambos grupos de ungulatos moderna ia deveni comun, con algas carnivor como la mesonix. Otra esemplos de ordinas moderna ia apare, como ciroteros, elefantes, primates, rodentes, e marsupiales. Fosiles de retiles, como pitones e tortugas, es comun. Multe ordinas de la avias moderna ia apare prima en la eosene. Alga fosiles de insetos es de la eosene, como los en la ambar de la Europa norde.

La mares de la eosene ia es calda e plen de pexes e otra viventes de mar. La selacos ia evoluida, e ance mamales de mar temprana, incluinte la basilosauro, un spesie temprana de setaseo cual es desendeda, probable, de animales de tera plu temprana. La asendentes de la sirenios (manatis e dugonges), relatas de la elefantes, ance evoluida a esta tempo.

La fini de la eosene ia es marcada par la estingui grande eosene-oligosene, ance conoseda como la Grand Coupure, pd la rompe grande.