Djini

De Vicipedia
Jump to navigation Jump to search

Djinis (de arabi: جن‎, jinn) es esentes supranatural en la tradisiones e mitolojia de Arabia ante e pos la aveni de islam. Como umanas, los ia es creada con fitra, naseda como pur e sin pecas (no como "peca orijinal" en cristiania), e sua ambientes alora cambia los. Car la djinis no es mal inata e no es bon inata, islam reconose spiritos de otra relijios, e ia es capas de adata los en sua estende. Djinis es no restrinjeda a un conseta muslim; los pote ance representa alga credes pagan cual ia es integrada en islam.

Seguente un sonda par la Sentro de Rexerca Pew en 2012, a min 86% en Maroco, 84% en Bangla, 63% en Turcia, 55% en Irac, 53% en Indonesia, 47% en Tai, crede en la esiste de djinis.

En la contesto de islam, la parola djini es usada per la nom de cualce esistente supranatural, e ance per un tipo spesifada. Per esta razona, djinis es comun combinada con demones, e ambos es videda como la causas de mal fortuna, posese spirital, e maladias. Ma djinis es a veses videda como suportante e bonvolente. Los es notada comun en obras de majia en la mundo muslim, e los pote es clamada e liada con la sorsor.

En alga tradisiones, la anjeles ia es creada a mercurdi, la djinis a jovedi, e la umanas a venerdi (un mil anios pos la anjeles). La comunia de la djinis es simil a los de umanas, ma alora dejenera e nonjustia entre los ia descrese, e tota avertis de Dio ia es iniorada. Seguente, Dio ia envia sua anjeles per batalia con la djinis nonfidas. Sola un poca pote survive, e los ia es enviada a isolas distante o montes. Con la revela de islam, la djini ia es donada un oportun nova per gania salva. Ma car los ia es creada plu temprana ca umanas, la djinis crede ce los es superior a umanas, e ia invia los sua ordina sur tera.

Studia muslim e nonmuslim jeneral distingui entre anjeles, djinis, e demones como tre tipos diferente de esistentes spirital. La linias entre djinis e demones es comun neblosa, car ambos es videda como causas de maladias, posese, e dementes. Djinis no es supranatural en la sensa de es pur spirital e transendente a natur; an si los es crededa como nonvidable (o frecuente nonvidable), los bevi, come, dormi, copula con la otra seso, e produi enfantes cual sembla sua jenitores.

Djinis es suposada como capas de apare en la formas de animales variosa, como scorpiones, buos, e asinos savaje. Canes es un otra animal asosiada con la djinis, spesial canes negra. Serpentes es la animales la plu asosiada con djinis, e multe naras conteni referes a serpentes cual es en realia djinis. Plu, djinis pote apare en neblas e tempestas de arena. Un cualia comun de djinis es sua manca de individualia, ma los pote gania individualia par materi en la forma de umanas.