Cultur Cucuteni-Tripilia

De Vicipedia
Jump to navigation Jump to search
Un mapa de la estende de la cultur
La vista de la Dnistr, Ucraina ueste
Un esemplo de la arte comun en la cultur

La cultur Cucuteni-Trypillia es un cultur neolitica-eneolitica (sirca 5200 a 3500 aec) de Europa este. Lo ia estende de la Montes Carpatian a la Rejiones de la Rio Dnistr e Rio Dnepr, sentrida a Moldova de oji e covrente partes de Ucraina ueste e Romania norde-este, con un area de sirca 350,000 km2 e un diametre de 500 km.

Membros de la cultur Cucuteni-Trypillia ia comparti alga cualias comun con otra sosias neolitica, incluinte:

  • Un nivel de strati sosial cuasi nonesistente;
  • Un asentia de un elite political;
  • Un economia simple, plu comun un economia de susiste e donada;
  • Cultivores susiste e pastores.

La majoria de vilas de esta cultur es composada de vilas peti ma densa, poneda tre a cuatro km de lunlotra, consentrada xef en la vales de la Rio Siret, Rio Prut (sude), e Rio Dnistr. En la periodo media de 4000 a 3500 aec, poplas de la cultur ia construi la vilas la plu grande en Europa neolitica, algas conteninte tan multe como 3000 strutures e posible 20,000 a 46,000 persones.

Un aspeta la plu notable de esta cultur ia es la destrui periodal de la vila, con cada abita singular avente un longia de vive de sirca 60 a 80 anios. La intende de la arde es la sujeto de debata entre studiantes; alga de la vilas ia es reconstruida multe veses supra niveles de abitadas plu temprana, conservente la forma e orienta de la construidas plu vea. La loca Poduri en Romania ia mostra 13 niveles de abita cual ia es construida sur lunlotra tra multe anios.

La plu de la vilas ia es locada prosima a la rios, con min vilas a la planos. La plu de abitadas temprana ia es en la forma de casa escavada, an ce los ia es acompaniada par un aveni sempre cresente de casas de arjila supra-tera. La solos e ximinerias de esta strutures ia es fabricada de arjila, e la mures de lenio o canas covreda con arjila. Tetos ia es fabricada de cana o palia.

La abitantes ia es ocupada con eleva animales, cultiva, pexa, e colie. Trigo, segal, e pisos ia es cultivada. Utiles ia inclui arados fabricada de cornos, petra, oso, e bastones puntida. La colie ia es fada con falxes con laminas de petra focosa entarsiada. La gran ia es molida a farina par rotas de petra. Femes ia es envolveda en ceramica, la fabrica de stofa e vestes, e ia ave un rol sinifiante en la vive de la comunia, Omes ia xasa, pastoria, la fabrica de utiles de petra, petra focosa, e oso.

De la bestias, boves ia es la plu importante, con porcos, oveas, e capras en roles min importante. La demanda de si la cavalo ia es domada en esta periodo de la cultur Cucuteni-Trypillia es ancora disputada par istoristes; restas de cavalos ia es trovada, ma lo no es clar si los ia es de cavalos savaje o domada.

Figuras de arjila de femes e joalas pendante ia es trovada cual dati a esta periodo. Benes de cupre, xef braseletas, anelos, e oncas ia es trovada ance.

La fini de la cultur no es bon conoseda. On ave du teorias (con alga varias) comun: La suportores de la ipotese curgan crede ce la popla de la curganes ia invade la area de la cultur Cucuteni-Trypillia sirca 3000-2800 aec. Un varia sujeste ce lo es posible ce la membros de la sosia faminte ia deside ce los ia debe la pastoralisme de sua visinas, e no ia es invadeda.

Un otra teoria sujeste ce, pos milenias de cultiva de desforesti, la solo ia perde sua fertilia, e ia deveni un cuasi deserto, simil a la "basin de polvo" en la planos de America Norde en la desenio de 1930. Un varia sujeste ce la clima ia deveni plu calda e seca, cual causa la problem.

On debe recorda, ancora, ce la cultur Cucuteni-Trypillia ia flori per multe miles de anios sin cualce conseta de gera, e ia produi un de la sivilias la plu sofisticada de sua eda.