Cri (lingua)

Cri ᐃᔨᔫ ᐊᔨᒧᐎᓐ
Parlada en:	Canada, SUA
Area:
Tota parlores:	120 000
Familia:	Linguas Algoncian
State ofisial
Lingua ofisial de:
Regulada par:
Sifras
ISO 639-1:	cr
ISO 639-2:	cre
ISO 639-3:	[1]
SIL:	[2]
Mapa
La areas do es parlada
Vide ance: Lingua – Lista de linguas

La lingua cri es un de la linguas algoncian e a un tempo ia es la lingua la plu estendeda en la norde de America Norde. Lo es parlada par la popla Cri, la americanes orijinal de Canada e la SUA norde-este, ci abita entre la Montes Rocosa e la Mar Atlantica.

Scrive e pronunsia

La lingua es nomida Iiyiyuuayimuwin par la parlores, e es scriveda ᐃᔨᔫ ᐊᔨᒧᐎᓐ en la alfabeta Cri (un varia de alfabeta de canadianes orijinal). Per esemplo, asi es la numeros cri en du formas:

	Alfabeta Latina	Alfabeta Cri
1	peyakw	ᐯᔭᒄ
2	niishu	ᓃᔓ
3	nishtu	ᓂᔥᑐ
4	neu	ᓀᐤ
5	niyaayu	ᓂᔮᔪ
6	kutwaashch	ᑯᐧᑖᔥᒡ
7	niishwaashch	ᓃᐧᔖᔥᒡ
8	niiyaanaaneu	ᓂᔮᓈᓀᐤ
9	peyakushteu	ᐯᔭᑯᔥᑌᐤ
10	mitaaht	ᒥᑖᐦᑦ

Per la resta de esta article, la dialeto nomida cri de plano (ᓀᐦᐃᔭᐍᐏᐣ nēhiyawēwin) es usada per esemplos. De la 80 000 persones ci parla cri, sirca 34 000 parla esta dialeto, xef en Saskatchewan e Alberta, ma ance en Manitoba e Montana. La cuantia de parlores es diminuinte, e la plu es persones vea.

La alfabeta latina es ance usada. La consonantes es p, t, k, c (pronunsiada ts), m, n, s, h, w, e y. Alga persones inclui la esplodente glotal ʔ, p, t, k, e c pote es vosida o no vosida, dependente de la sonas prosima. La vocales es i, ī, ē, a, ā, o, ō. La macron (¯) indica un vocal plu longa.

Ordina de parolas

La ordina normal es SVO, pe awāsisak nipahēwak sīsīpa ("la enfantes ia mata alga patos"), ma tota otra ordinas es ance posible. Natural, la sujeto o la ojeto o ambos pote es cadeda, car la "pronom" es incluida en la verbo. La usa de nomes es plu comun a la comensa de un conversa o a la fini, o pote indica un asentua.

Morfolojia

La lingua cri es clasida como un lingua polisintesal e fusinte, par causa de la complica de sua combinas de afisas.

Nomes

Car la plu de informa gramatical es en la verbo, nomes es plu simple. Nomes es marcada con prefisas de posese, cual es combinada con sufisas per plural, per esemplo ni(t)-...-inān per "nos" (escluinte). Sufisas indica la peti, la plural (-ak e -a), e la loca (-ihk). Esta formas ave varias predisable.

Prefisas de posese

	Singular	Plural
Person un	ni-	ki(t)-...-inaw (incluinte); ni(t)-...-inān (escluinte)
Person du	ki(t)-	ki(t)-...-iwāw
Person tre	o(t)- (person prosima); o(t)-...iyiw/ (person periferial)	o(t)-...-iwāw

Sufisa de loca

Car cri no ave un sistem vera per marca la caso de un nom, lo usa otra metodos, como sufisas per dirije de ata e la persones periferial a la verbo, e la sufisa de loca a la nom. La sufisa ehk o enāht ave la sinifia de "a", "en", "sur", etc. Per esemplo, on pote comensa con la radis skāt ("gama") e ajunta ni- per crea niskāt ("mea gama"), e alora ajunta -a per plurali – niskāta ("mea gamas"). Alora, on pote ajunta la sufisa de loca: niskātihk ("sur mea gamas"). La otra varia enāht indica distribui, normal de umanas e animales, pe ayīsiyiniw- ("umana") deveni ayīsiyinināk ("entre la umanas" o "en la mundo"), o sāsīw ("person de la Sarcis") deveni sāsīnāhk ("a la reserva de la Sarcis").

Verbos

Modeles

Como otra linguas de la americanes orijinal, la verbo plen conteni un serie de morfemes cual ave locas seguente un model.

Preverbos
- A — Person
- B — Tempo
- C — Moda
- D — Aspeta 1
- E — Aspeta 2
- F — Aspeta 3
- G — Cualia de ata (Aktionsart)
Radis
Sufisas
- I — Ojeto periferial
- II — Dirije de ata
- III — Valentia
- IV — Vos
- V — Sujeto periferial
- VI — Person
- VII — Plural
- VIII — Ipotesal

Prosima a la comensa de la verbo completa, on trova particulas de suordina como ē o kā e preverbos de futur e segue como ka e kita. Pos los, on trova morfemes diversa cual es ordinada en scala de la plu astrata a la plu concreta. Preverbos astrata inclui āta ("an si", "futil" – per esemplo ē-āta-kitōtāt "an si el ia parla a el") e wī ("vole", "intende" – per esemplo wī-mēscihāwak "tota de los va es matada"). Esemplos de preverbos concreta inclui kāmwāci ("cuieta" – per esemplo kī-kāmwāci-pimātisiwak) o nēwo ("cuatro" – per esemplo ē-kī-nēwo-tipiskāyik "cuando la note cuatro ia pasa"). Otra preverbos indica tempo, moda e aspeta.

Redupli

Du formas de redupli aveni en verbos. Los indica la continua, la repete o la intensia de la ata. En la forma prima, la radis cambia, pe pim ("longa") deveni papām ("consernante"). La forma du es plu coerente e plu produinte, usante la consonante prima con a:, pe /kākīpa/ ("denova e denova").

Dirije

La dirije de la ata es espresada par prefisas e sufisas cual indica la persones. Per esemplo, la indicante de dirije -i- en la frase ki-wāpam-i-n sinifia ce "tu vide me". La indicante de inversa -iti en la frase ki-wāpam-iti-n indica ce "me vide tu".

Dirije:

	(2-1)	(1-3)	(3-(3'))	(3'-(3'))
Cri de planos	kitasamin	nitasamāw	asamēw	asamēyiwa
Lfn	tu nuri me	me nuri el	el nuri el	el nuri el

Inversa:

	(1-2)	(3-1)	((3')-3)	((3')-3')
Cri de planos	kitasamitin	nitasamik	asamik	asamikoyiwa
Lfn	me nuri tu	el nuri me	el nuri el	el nuri el

Nota ce la situa es plu complicada cuando ambos persones es persones tre. En la frase sēkihēw nāpēw atimwa, la ata sēkihēw ("asusta") es en la forma direta (con la sufisa -ēw-). La nom nāpēw ("om") es la person prosima (plu importante), e la nom atimwa ("can") es marcada con la sufisa -wa como la "person periferial (min importante). Ma en la frase sēkihik nāpēw atimwa, la verbo es en la forma inversada (-ik), e donce la sinifia deveni "la can asusta la om", con la om ancora como la person plu importante. Si on move la sufisa de periferia a la om en loca de la can, la frases ta ave la mesma sinifias ma con la foca a la can.

Inclui de la nom

En alga casos, la nom ojetal pote es incluida en la verbo. Per esemplo, nōcihiskwēwēw ("el xasa femes") inclui la nom iskwēw ("fem") en la verbo. Esta pote ance es espresada como iskwēwa nōcihēw, ma la inclui sinifia un ata plu abitual, simil a "el es un xasafem".