Cosmopolitanisme

De Vicipedia
Jump to navigation Jump to search
Tera, como videda de Apollo 17

Cosmopolitanisme es la ideolojia cual dise ce tota umanas parteni a un sola comunia, fundida sur un moralia compartida. Un person ci adere a la idea de cosmopolitanisme en cualce de sua formas es nomida un cosmopolitan.

Un comunia cosmopolitan es fundida sur un moralia incluinte, un relata economial compartida, o un strutur political cual inclui nasiones variosa. En un comunia cosmopolitan, individuas de locas diferente (pe nasional, etnical, fisical, economial, etc) forma relatas de respeta mutual, an si los difere en sua credes de relijio, political, etc. En alga locas en la pasada, e algas aora, ia es nomida "cosmopolitan" an si la popla no abrasa la filosofia de cosmopolitanisme, ma sola car persones de tradisiones diferente etnical, cultural, o relijiosa abita e interata pasosa con lunlotra. Cosmopolitanisme ia deveni un promove per pas e armonia entre nasiones, fundida sur comprende, tolera, e interdepende.

Orijinal, cosmopolitanisme ia sujeste la institui de un "stato mundal" cual ta inclui tota umania. La parola deriva de elinica antica κοσμοπολίτης, o kosmopolitês, formida de "κόσμος", kosmos, pd "mundo" o "universo" e πολίτης, "politês", pd "sitadan" o "un de la site".

Cosmopolitanisme pote es trasada a Diogene de Sinope (sirca 412 aec), la padre de la filosofia sinica en Elas antica. "Cuando on ia demanda de do el ia veni, el ia responde 'Me es un sitadan de la mundo'". La modo de comprende la cosmopolitanisme de la stoicas es par la model de Hierocle: Nos debe regarda nos mesma como sirculos consentrica, la prima sirca la individua, sirculo du - la familia, sirculo tre la comunia, etc, asta on ariva al a sirculo la plu grande, lo de umania. Per deveni sitadanes de la mundo, on debe trae la sirculos a la sentro, resultante en vide tota persones como familia.

Immanuel Kant ia presenta la idea de un ius cosmopoliticum (leje o direto cosmopolitan) como un prinsipe gidante per proteje popla de gera, e el fundi moral esta direto par la prinsipe de ospita universal. Kant ia razona ce la estende de ospita regardante a usa de la tera, cual parteni a umania intera, ta trae umania plu prosima a un constitui cosmopolitan.

En la eda moderne, la consetas de etica e ospita de Emmanuel Levinas e Jacques Derrida furni un strutur theorial per la relatas entre persones en sua vives dial e separada de cualce forma de leges o regulas scriveda. Levinas ia dise ce on no ave un "lege moral universal", ma sola un senti de obliga (bonia, pardona, carita) ce la otra person, en un state de peril, demanda de on. Per Derrida, la fundi de etica es ospita, la prepara e tende per bonveni la otra person a sua casa. Etica, el dise, es ospita. Esta ideas presente la posible ce on aseta la otra person como diferente ma de state egal.

En sua teorias, isola no es un alternativa pratical en la mundo, e donce lo es importante ce nos considera como nos prosimi esta interatas, e cual nos e la otra person ta risca, cual constrinjes de ospita nos debe pone, e esce nos debe responde a la clama de la otra person.

Un paso plu a cosmopolitanisme ia aveni pos la Gera Mundal 2: Como un reata a la Olocausta e otra masacras, la conseta de crimines contra umania ia deveni un categoria jeneral asetada en lege internasional. Esta mostra la apare e aseta de la idea de culpablia individua a umania intera.

Cosmopolitanes filosofial es universalistes moral: los crede ce tota umanas (e no sola cameradas o cositadanes) opera su la mesma normas de moralia. La bordas e diferes entre nasiones, statos, cultures, o sosias es donce nonimportante per moralia.

Kwame Anthony Appiah ia dise ce nos abita en un momento istorial unica, un eda emerjente de sivilia mundal, cual crea la posiblia de un identia cosmopolitan como sitadanes de la mundo. Esta es suportada par la developa de telecomunica, viaja a spasio, instituis como la Nasiones Unida, corporas internasional, menasas ecolojial como caldi mundal, educa per tota clases, sesos, etc.

Thich Nhat Hanh, un filosofiste budiste, promove compati e comprende per proteje e vive armoniosa con tota persones, animales, plantas, e la ambiente. El nota ance ce con debe es consensa de sufri per developa compati, spesial la sufris causada par estremisme e nontolera, empapa con credes streta, imposa de vistas, coleria, e malcomunica. Par deveni consensa de sufri, on developa compati e la capasia de reconose stranjeres como persones.

Otra filosofistes e ativistes, como Paul Gilroy, oserva ce la promove de ideas de raza e ierarcias de diferes contribui a odia a otras. Par deconstrui esta ideolojias, on move a compati e la umani de otras. Per ateni esta compati, el sujeste ce nos debe cultiva un grado de stranjeri de nosa propre cultur e istoria, par esposa nos memsa a otras.

Jesús Mosterín oserva ce la sistem political de la mundo debe es organizada per masima libria e oportunia individual. El foca sur libria political, pd la asentia de forsa o interfere par otras en desides personal. Car nos ave tendes a violentia e combatosia cual abita en la natur umana, alga constrinje de libria es nesesada per interata sosial pasosa o produosa. Ma la plu libria cual nos joia, la plu bon. Serta, on no ave un razona per limita la librias cultural (de lingua, relijio, tradisiones) per la benefica de nasion, eglesa, o partito. E on no ave un bon razona per restrinje la move libre de persones, ideas, o benes. Mosterín proposa ce la nasion-stato no es la plu bon modo de developa completa de libria. En loca, el sujeste ce nos developa teritorias peti, como la cantones de Suiz, autonomal ma no autocrata, completeda par organizas mundal forte.

Multe cosmopolitanes promove la idea de sitadania mundal par permete ce tota partisipa en la vive political, un democratia cosmopolitan. Otras, criticante la natur astrata de alga varias de cosmopolitanisme, sujeste ce lo debe es fundida sur un idea de "patriotisme mundal".

A la otra lado, alga governas e promoves ia usa la idea de cosmoplitanisme como un blanco de propaganda. Per esemplo, nazis ia refere a iudis como "cosmopolitanes sin radises", e Iosif Stalin ia dise ce "cosmopolitanisme stranjer" debe es combatada par bon comunistes. En la sentenio 21, Vladimir Putin en Rusia e nasionalistes en Magiar e Polsca (entre multe otras) usa la parola "cosmopolitan" como un parola negativa. En la governa de Donald Trump en la SUA, algas de sua suportores ia refere a un "prejudi cosmopolitan" de sua criticores. Cualce grupo cual pone autointerese supra la interesa de umania tende odi o teme cosmopolitanisme.