Cosini italian
.jpg)
La cosini italian es comeda tipal de Italia. Lo ia developa tra sentenios cambias sosial e economia, con radises cual estende a antica.
Cambias major ia aveni con la coloni de la Americas e la introdui de patatas, tomates, peperones, mais, e betas dulse. La cosini italian es conoseda per sua diversia, spesial entre la norde e sude de la penisola italian. La cosini ofre un abunda de sabores, e es un de la plu popular e copiada en la mundo. Lo ia influe alga otra cosinis tra la mundo, spesial lo de la SUA.
Cosini italian es jeneral marcada par sua simplia, con multe platos con sirca du a cuatro ingredientes major. Cosinores italian depende xef de la cualia de la ingredientes, en loca de prepara complicada. Ingredientes e platos varia par rejion. Multe platos cual ia es a un ves rejional ia sperde con varias nova tra la pais.
An si la pais nomida Italia no ia unida asta la sentenio 19, la cosini pote ave radises tan distante en la pasada como la sentenio 4 aec. Comedas e cultur ia es multe importante a la eda, como mostrada par la libro de cosini (Apicus) cual dati de la sentenio 1 aec. Tra la sentenios, rejiones visina, concistores, xefes major, turbas political, e la descovre de la mundo nova ia influe sua developa. Comedas italian ia comensa forma pos la cade de la Impero Roman, cuando sites diferente ia comensa separa e forma sua propre tradisiones. Multe tipos diferente de pan e pasta ia es preparada, e on ave un varia en tecnicas e preparas. La pais ia es fendeda. Cosini rejional es representada par alga de la sites major en Italia. Per esemplo, Milan (en la norde de Italia) es conoseda per sua risotos, Bologna (en la sentro de la pais) per sua tortelini, e Napoli (en la sude) es famosa per sua pizas e spageti.
Eda antica[edita | edita la fonte]
La scrivor de cosini prima conoseda de Italia ia es un sisilian elinica nomida Arcestrato de Siracusa en la sentenio 4 aec. El ia scrive un poesia cual parla de usa ingredientes de "cualia la plu alta e saisonal". El ia dise ce sabores debe no es mascida par spises, erbas, o otra ajuntas. El ia vide la prepara de pex simple como multe importante.
Simplia ia es abandonada e reponeda par un cultur de cosini sofisticada en cuando la Impero Roman ia developa. Per la tempo, De re coquinaria ia es publicida en la sentenio 1 ec, lo ia conteni 470 resetas cual demanda la usa pesosa de spises e erbas. La romanes ia emplea panores per produi pan e ia importa cesos de Sisilia car la sisilianes ia ave un reputa per es la cesores la plu capas. La romanes mesma ia eleva capras per la carnerias, e ia cultiva caxofas e poros.
Eda medieval[edita | edita la fonte]
Con la tradisiones de cosini de Roma e Atina, un cosina ia developa en Sisilia cual algas sujesta ia es la cosini italian vera prima. Arabis ia invade Sisilia en la sentenio 9, e ia introdui spinax, amandas, e ris. En la sentenio 12, un re norman ia studia Sisilia e ia vide persones fabricante cordas longa de farina e acua nomida atriya, cual plu tarda ia es nomida trii, un parola ancora usada per spageti en Italia sude. Normanes ia introdui la casola, gado salida (baccalà), e gado secida, tota cual resta popular.
La conserva de comedas ia es o cimical o fisical (car friadores no ja esiste). Carnes e pexes ia es fumida, secida, o mantenida sur jelo. Sal e marin ia es usada per conserva cosas como arenge e per prepara porco. Radises ia es conservada en marin pos ce los ia es poxeda. Otra modos ia inclui la usa de olio, vinagra, o par sumerji carnes en gras fondeda e conjelada. Per conserva frutas, los ia usa licor, miel, e zucar.
La rejiones norde de Italia ia mostra un misca de la cultures germanica e roman, cuando la sude refleta la influes arabi, la resulta de la sperde de cosini mediteraneo par comersia arabi. La libro italian la plu vea sur cosini es la Liber de coquina, scriveda en la sentenio 13 en Napoli. Platos ia inclui col en la stilo de romanes (ad usum romanorum), peti folias preparada en la stilo de campanianes (ad usum campanian), un plato de favas de la Marca di Trevisio, un torta compositum londardicum, preparada simil a platos de oji. Du otra libros de la sentenio 14 ia inclui resetas per pastello roman, tarte de lasanie, e un demanda per usa sal de Sardinia o Chioggia.
En la sentenio 15, Maestro Martino ia es la xef per la Patriarca de Aquileia a la Vatican. Sua Libro de arte coquinaria descrive un cosina plu refinada. Sua libro conteni un reseta per maccaroni siciliani, fabricada par envolve pasta sirca un bara magra de fero per seci su la sol. La macaroni ia es coceda en bulion de galo saborida con zafran, sujestante influes persian. Notable es la evita par Martino de spises esedente, e prefere per erbas fresca. La resetas roman ia inclui coppiette (salami secida en aira) e platones con col. Sua platos firenzal ia inclui ovos con torta bolonian, torta sienan, e resipes jenoan como piperata (dulses), macaroni, zuca, xampiniones, e tarte de spinax e oniones.
La libro par Martino ia es incluida en un libro par Bartolomeo Platina de 1475, primida en Venezia, nomida De honesta voluptate e valetudine ("sur plaser onesta e bon sana"). Platina pone la libro de Martino en un contesto rejional, scrivente sur perca de Lago Maggiore, sardinas de Lago Garda, salmon de Adda, galos de Padua, olivas de Bologna e Piceno, etc.
Eda premoderna[edita | edita la fonte]
La cortes de Firenze, Roma, Venezia, e Ferrara ia es sentral a la cosini. Cristoforo de Messisbugo, manejor per Ippolito d'Este, ia publica Banchetti Comosizioni de Vivande en 1549. El ia dona resetas per tartes, con 124 resetas con plenis variosa. El ia asentua la usa de spises de la este, e zucar.
En 1570, Bartolomea Scappi, xef personal a Pape Pius 5, ia scrive sua obra en sinco volumes, presentante un vista completa de cosini italian de la periodo. Lo conteni plu ca un mil resetas con informa sur bancetas, incluinte esibi e menus, con imajes de utiles de cosina e table. Esta libro difere de la plu de libros scriveda per cortes real en sua prefere per animales domada e avias de la jardin en loca de la xasa. Resetas inclui talias min valuada, como lingua, testa, e spala. En volum 3, on trova resetas per pex per cuaresma. Prepare ia es simple, e inclui poxe, grili, e frita pos marina. La volum final inclui tartes, fritadas, un resetas per un piza dulse de Napoli (no como pizas de oji, car tomates no ia es ja introduida a Italia. Ma alga cosas de la mundo nova ia es presentada, como mais e pavo.
En la prima desenio de la sentenio 17, Giangiacomo Castelvetro ia scrive Breve Racconto di Tutte le Radici di Tutte l'Herbe et di Tutti i Frutti (pd "un raconta de tota radises, erbas, e frutas"), traduida a engles par Gillian Riley. Castelvetro ia move de Modena a England car el ia es protestante. La libro asentua vejetales como un parte sentral de la come, no sola como ajuntadas. El ia sujesta boli lente la vejetales en acua salida e servi los calda o fria con olio de olivas, sal, peper fresca molida, jus de limon, jus verde, o jus de orania. El ia sujesta ance rosta vejetales en paper umida sur carbon de lenio con un pluveta de olio de olivas.
En 1662, Bartolomeo Stefani, xef per la Duxe de Mantua, ia publica L'Arte di Ben Cucinare. El ia es la prima ci ia ofre un sesion sur vitto ordinario ("comedas comun"). La libro descrive un banceta de Duxe Carlo per Rea Christina de Sveria, con detalias sur la comedas e vista de table per cada ospitada, inclui un cotel, force, culier, vitro, e plato (en loca de la boles usada plu comun), e un teleta.
Eda moderna[edita | edita la fonte]
A la comensa de la sentenio 18, libros de cosini italian ia comensa asentua la rejionalisme de la cosini de Italia en loca de la cosini de Frans. Libros scriveda alora ia no es plu dirijeda a xefes profesal ma a femes de casa de la burjeses. Peti libros como La cuoca cremonese ("La cosinor de Cremona") en 1794 ia dona un ordina de ingredientes seguente la saison, con capitoles sur carne, pex, e vejetales. En cuando la sentenio ia progresa, esta libros ia crese en grandia, popularia, e frecuentia.
En la sentenio 18, testos medical ia avisa ce campaniores debe no come comedas refinada car estas ta es tro rica per sua dijesta povre. Lo ia es crededa ce campaniores ia come povre car los prefere come povre. Ma, en realia, multe campaniores ia come comedas putrida e pan mofosa car aceles ia es cual los pote compra.
En 1773, Vincenzo Corrado, de Napoli, ia publica Il Couco Galante (la cosinor cortes), cual asentua vitto pitagorico (comedas vejetaliste), nomida tal car Pitagoro ia come sola vejetales. Esta ia es la libro prima cual dona la rol sentral de la tomate en 13 de sua resetas. Simil, el ia promove la usa de la patata. E, en 1790, Francesco Leonardi, en sua libro L'Apicio moderno, ia dona un istoria de cosini italian de la eda de la romanes - e ia dona la reseta prima de un salsa fundida sur la tomate. La cucina Teorico-Pratica par Ippolito Cavalcanti ia descrive la reseta prima per pasta con tomates.
La scienza in cucina e l'arte di mangiare bene ("La siensa de cosini e la arte de bon come"), par Pellegrino Artusi, prima publicida en 1891, es regardada como la libro canonal de cosina moderna de Italia, e es ancora primida.
Ingredientes[edita | edita la fonte]
Cosini italian ave un varia grande de ingredientes comun usada, como frutas, vejetales, salsas, carnes, etc. En Italia norde, pex, patatas, ris, mais, salsixes, porco, cesos variosa es plu comun. Plato de pasta con tomate es sperdeda tra tota Italia. Italianes prefere sua ingredientes fresca e con spises sutil. Pesto, un salsa ligurian con basil, olio de oliva, e nozas de pino, pote es comeda con pasta o como un sopa. Olio de oliva es la olio la plu popular e, en salsas, comun repone gras animal.
Cosini italian es ance conoseda per sua usa de pasta, cual inclui talietas en longias, largias, e formas variosa. La plu es nomida per sua formas: pene, macaroni, spageti, linguine, fusili, lasanie, e otras cual es plenida con otra ingredientes - ravioli e tortelini. Nioci (bales de pasta), fada de patatas, es a veses ance nomida pasta.
Pasta es categorida en du stilos fundal: secida e fresca. Pasta secida es preparada sin ovos e pote es conservada per asta du anios, e pasta fresca pote es retenida per alga dias en un friador. Pasta es plu comun coceda par boli. En Italia, pasta es tradisional coceda al dente (per "dur a la dentes", pd no tro mol). En Italia, pasta es normal fabricada de farina de trigo dur o semola.