Aljebra

De Vicipedia
Jump to navigation Jump to search

Aljebra es un ramo de matematica consernante la studia de la reglas de operas e relatas e la construis e consetas derivada de los, incluinte termas, polinomios, egalis e strutures aljebral.

Con jeometria, analise, topolojia, combinatoria e teoria de numeros, aljebra es un de la ramos xef de matematica pur.

Etimolojia[edita | edita la fonte]

La parola aljebra veni de la arabi الجبر (al-jabr let. "la reuni de partes rompeda") de la titulo de la libro Ilm al-jabr wa'l-muḳābala par la matematiciste e astronomiste farsi al-Khwarizmi.

Istoria[edita | edita la fonte]

La radises de aljebra pote es segueda asta la babilonianes antica, ci ia developa un sistem aritmetical avansada con cual los ia es capas de fa calculas en un forma algoritmal. La babilonianes ia developa formulas per calcula solves per problemes cual oji es solveda usante egalis linial, egalis cuadral e egalis linial nondeterminada. Par contrasta, multe egipsianes de esta epoca, como ance matematicistes elinica e jonguo en la milenio 1 aec, comun ia solve tal egalis con metodos jeometrial, como aceles descriveda en la papiro matematical de Rhind, la Elementos de Euclide e La nove capitoles sur la arte matematical. La labora jeometrial de la elinicas, marcada en la Elementos, ia furni la strutur per jenerali formulas ultra la solve de problemes individua en sistemes plu jeneral per solve egalis, an si esta ta no es fada asta la developa de matematica par la islam medieval.

En la epoca de Platon, la matematica elenica ia esperia un cambia radisal. La elinicas ia crea un aljebra jeometrial en cual termas ia es representada par lados de ojetos jeometrial, usual linias, cual ia ave leteras asosiada con los.