Alexandro la Grande

De Vicipedia
Un sculta de Alexandro la Grande de la sentenio 3 aec, suscriveda Menas
Alexandro (a sinistra) combatente un leon con sua ami Cratero; un mosaica de sentenio 4 aec

Alexandro 3 de Macedon (elinica: Αλέξανδρος Γʹ ὁ Μακεδών, 20/21 Julio 356 aec – 10/11 Junio 323 aec), comun conoseda como Alexandro la Grande (elinica: Ἀλέξανδρος ὁ Μέγας), ia es un re (basileus) de la rena elinica Macedon e un membro de la dinastia Argean. El ia nase en Pella en 356 aec e ia segue sua padre Filipo 2 a la trono cuando de 20 anios. El ia spende la plu de sua anios de rena sur un campania militar sin presedente tra Asia sude-ueste e Africa norde-este, e per la eda de 30 anios, el ia crea un de la imperos la plu grande de la mundo antica, estendente de Elas a India norde-ueste. El ia es sin defeta en batalia e es videda como un de la comandores militar la plu susedosa de istoria.

Cuando un joven, Alexandro ia es instruida par Aristotele asta 16 anios. Pos la asasina de sua padre en 336 aec, el ia segue sua padre a la trono e ia erita un rena forte e un armada esperiosa. Alexandro ia es donada la jeneralia de Elas e ia usa esta autoria per comensa la projeta de sua padre per gida la elinicas en la concista de Persia. En 334 aec, el ia invade la Impero Acemenan (pd, Persia) e ia comensa un serie de campanias cual ia dura 10 anios. Seguente la concista de Anatolia, Alexandro ia rompe la potia de Persia en un serie de batalias desidente como la Batalia de Isso e lo de Gaugamela. El ia suverti Re Dario 3 de Persia e ia concista la Impero Acemenan intera. A acel punto, sua impero ia estende de la Mar Adriatica a la Rio Beas.

Alexandro ia atenta ateni la "finis de la mundo e la mar esterna grande" e ia invade India en 326 aec, e ia gania un vinse importante sur la Pauravas a la Batalia de la Hidaspes. Ultima, el ia returna a la demanda de sua soldatos anelante sua propre pais. El ia mori en Babilon en 323 aec, la site cual el ia intende funda sua capital, sin esecuta un serie de campanias intendeda cual ia ta comensa con un invade de Arabia. En la anios pos sua mori, un serie de geras interna ia rompe sua impero, cual ia resulta en la institui de alga statos, renada par la diadochi, sua jenerales e eritores survivente.

La lega de Alexandro inclui la difusa e sintese cual sua concistas ia promove, como Budisme Elinica. El ia funda alga 20 sites cual porta sua nom, spesial Alexandria en Egipte. Alexandro ia coraji colonistes elinica, e la sperde de cultur elinica en la este ia resulta en un sivilia elinica nova, aspetas de cual e ancora evidente en la tradisiones de la Impero Bizantian en la sentenio 15 ec, e la presentia de parlores elinica en Anatolia sentral e este asta la jenoside elinica par la turces en la desenio de 1920. Alexandro ia deveni un eroe clasica en la molda de Acile, e el apare importante en la istoria e tradisiones e mitos de cultures elinica e nonelinica. El ia es sin defeta en batalia e ia deveni la mesura con cual xefes militar compara se. Academias militar tra la mundo ensenia ancora sua taticas. El es frecuente gradida entre la persones la plu influente en istoria.