Babilon

De Vicipedia
Jardines de Babilon.

Babilon (site antica) es la site major de la mundo antica, situada a 90 km a sude de Bagdad, Irac (aora). Sirca 2200 aec, Babilon ia es conoseda como la loca de un templo grande. En la sentenio 21 aec, lo ia es renada par Ur, un site prosima. Babilon ia es un site-stato nondependente en 1894 aec, cuando la re Dumu-Abum amorian ia fundi ala un dinastia. Esta dinastia ia ariva a sua culmina en la sentenio 18 aec su Hammurabi.

En 1595 aec , la site ia es caturada par hititas, e plu tarda ia veni su la controla de la dinastia casita (1590?-1155 aec). La casitas ia estende Babilon a la pais Babilonia e ia fa ce la site deveni la sentra relijial e dirijal de esta rena.

De la tarda de la sentenio 8 aec asta cuando Nabopolasar ia esclui la asirianes, entre 626 e 615 aec, la site ia parteni a la Impero Asirian. Nabopolasar ia fundi la dinastia babilonian nova, e sua fio Nebucadnezar du ia estende la rena.

En 539 aec Sirus la grande ia ajunta Babilonia a la Impero Farsi nova fundida. Alexandro la grande ia catura la site en 330 aec. Plu tarda, lo ia es usada como un capital par la dinastia seleusida fundida par renores ci ia segue Alexandro. En la temprana de la sentenio 3 aec, la plu de la popla de Babilon ia es moveda a un capital nova, e la site ia desapare cuasi ante la veni de islam en la sentenio 7 ec.

Babilon ia es la plu bon conoseda per Esagila, la templo de Marduk; Etemenanki, un zigurat de 7 niveles; e la jardines pendente, un de la 7 mervelias de la mundo antica, cual Nebucadnezar 2 ia construi per sua sposa.