William Shakespeare

De Vicipedia
William Shakespeare

Informa personal

Nase: nonconoseda, Stratford-upon-Avon, Warwickshire, England
Mori: 23 April 1616, Stratford-upon-Avon, Warwickshire, England
Pais: England

Otra informas

Profesa: Poesior e autor teatral

William Shakespeare (pronunsiada Uliam Xecspir; 1564–1616) ia es un poesiste e autor teatral de England. On regarda el como la autor la plu alta en la lingua engles, e la dramiste la plu eselente en la mundo. El ia es batizada en Stratford-upon-Avon, Warwickshire. En 1582 Shakespeare ia sposi Anne Hathaway. Los ia jenita un fia en 1583 e jemelos — fia e fio — en 1585. La fio no ia survive.

En 1592 Shakespeare ia deveni famosa como ator e autor teatral. Sua reputa como poesiste capas e popular ia culmina pos la publici de sua du naras poesial Venus e Adonis (1593) e La Viole de Lucretia (1594) e sua sonetos (1609).

En la eda presente, Shakespeare es xef conoseda per sua 38 teatrales. El ia fundi sua propre compania de atores, The Lord Chamberlain's Men, plu tarda nomida The King's Men, e du teatros: la Teatro de Globo e Teatro Blackfriars.

Sua teatrales temprana inclui: Henry 6, partes 1, 2 e 3 (1590?–92?) e Richard 3 (1593?), sur la vilia cual resulta de rena debil e de nonunia nasional.

Ance a la comensa, el ia scrive comedias La comedia de eras (1592?), La doma de la fem odiosa (1593?) La du seniores de Verona (1594?), e Laboras perdeda de ama (1594?).

A pos, el ia es la autor de teatrales istorial — Richard 2 (1595?), Henry 4, partes 1 e 2 (1597?), e Henry 5 (1598?).

La comedias amada inclui La sonia de un note de estate (1595?), La mercator de Venezia (1596?), Multe ruido per no cosa (1599?), Como lo plase tu (1599?), e Note des-du (1600?).

La du trajedias famosa es Romeo e Juliet (1595?), cual trata poesial la ama joven, draminte la fortuna de du amores ci es vitimes de disputas e malcomprendes de sua relatadas e sufri sua propre emosias fretada. Julio Cesar (1599?) es un trajedia seria de lutas political.

La obras ultima es comedias "amarga" e trajedias grande: Hamlet (1601?) sur venja e misca de vilia con gloria umana. Othello (1604?) depinta la crese de jelosia sin razona. Re Lear (1605?) trata la segues de la maljudi e freta de Lear.

Antony e Cleopatra (1606?) nara la ama focosa de la jeneral romanica Mark Antony per la rea misri Cleopatra. La ama de la du jovenes brilia gloriosa par la poesia la plu sensosa de Shakespeare.

Macbeth (1606?) nara la trajedia de un om ci sede a aspira avar. On ave ance du comedias "amarga": Tota es bon cual fini bon (1602?) e Mesura per mesura (1604?).

La trajicomedia romantica Pericles, prinse de Tiro (1608?) conserna la mori de la sposa de la carater titulal e la persegue de sua fia.

En Cymbeline (1610?) e La nara de inverno (1610?), carateres sufri peri e dole grande, ma reuni a la fini. En La tempeste (1611?), la trama sujesta la efetos beneficosa de junta la potentia con la sajia .

Vide ance[edita | edita la fonte]

Lias esterna[edita | edita la fonte]