Es o no es

De Vicipedia
Jump to navigation Jump to search

"Es, o no es" (en engles: "To be, or not to be") es la frase abrinte de un monologo parlada par prinse Hamlet en la teatral "Hamlet" par William Shakespeare, como un parte de la "sena de la soreria" en ata 3, sena 1.

An si lo es un monologo, Hamlet no es solitar. Espetante la atende par Hamlet, la xica Ophelia es finjente leje. Re Claudio e Polonio (la tio de Hamlet), ci ia envia Ophelia ala per descovre esce Hamlet es vera demente o sola finjente, ia asconde se prosima. An tal, Hamlet vide se como solitar.

En la monologo, Hamlet contempla suiside, deplorante la dole e nonjustia de vive. Ma el reconose ance ce la alternativa es cisa an plu mal. La sinifia de la parla es debateda par espertas, ma lo pare conserna la esita de Hamlet per venja la mata de sua padre par sua tio, sua estrapadre, e Re Claudio.

"Es, o no es" es un de la espresas la plu bon conoseda e sitada en engles, e la monologo con la plu referes en multe obras de leteratur, teatro, e musica. Asi es la monologo traduida a elefen par George Boeree:

Es? o no es?
Esta es la demanda:
Esce lo es plu nobil en la mente ce on sufri
la fondas e dardos de fortuna nonconstante,
O ce on prende armas contra un mar de menasas,
e par oposa, fini los?
Mori, dormi... no plu!
E par dormi per dise la intende de sesa
la doles de cor e la mil xocas de natur
cual la corpo erita;
Lo es un fini zelosa desirada.
Mori, dormi...
Dormi, posible sonia...
ai, acel es la problem,
Car en la dormi de mori cual sonias ta veni
cuando on ia pantofli a via de esta vaga de vive,
debe fa ce on esita.
Acel es la ruina de un vive tan longa:
la nonjustas de opresores;
la insultas de orgulosas;
la doles de ama rejetada;
la tardi de la lege;
la egosia de autoria;
E la despeta cual merita pasiente reseta de la nonmeritante,
cuando el mesma pote silenti se con un lama nuda.
Ci ta porta pacos, roncinte e suinte en un vive fatigante,
estra ce la teme de cualce cosa pos mori,
la pais no ja descovreda,
de cual sua frontera no viajor reveni,
confusa la vole,
E causa ce on ta prefere porta sua propre maladas,
plu ca freta a otras cual on no conose?
En tan modo, consiensa fa coardes de tota,
E en tan modo la determina natural
deveni debil su la ombra pal de pensa,
E emprendes de intensia e momento grande
devia de sua corentes,
e perde la natur de ata.
Silenti: Ofelia dulse!
Nimfa, en tua preas, recorda tota mea pecas.