Transmete de la clasicas elinica

De Vicipedia
Jump to navigation Jump to search
La ideas de Aristotele e Platon, mostrada en La Scola de Atina par Rafael, ia es perdeda partal en Europa ueste per sentenios.

La transmete de la clasicas elinica a la Europa ueste latina en la eda medieval ia es un elemento major en la developa de la vive inteletal en Europa ueste[1]. La interesa en testos elinica e sua disponablia ia es rara en la ueste latina en la eda medieval temprana, ma cuando la trafica a este ia aumenta ance lo fa la eruditia ueste.

La filosofia elinica clasica ia es composada de varia obras orijinal de aceles de Elas antica (pe Aristotele) a aceles eruditas elinica-roman en la Impero Roman clasica (pe Ptolemeo). An si aceles obras ia es orijinal scriveda en elinica, per sentenios la lingua de eruditia en la Mediteraneo, multe ia es traduida a arabi e farsi en la eda medieval e la fonte orijinal elinica ia es perdeda. Cuando la califias arabi ia asorbe la conose elinica-roman, la mundo muslim medieval ia deveni la sentro inteletal dominante en la Mediteraneo. Atentas seguente de traduis latina de eruditia arabi, incluinte la clasicas elinica, ia comensa cual plu tarda ta es conoseda como la Renase de la Ueste. Con un presentia ueste cresente en la este par causa de la crusadas, e la colasa gradal de la impero Bizantian en la eda medieval tarda, multe eruditas elinica bizantian ia trae con los multe de la manoscritos elinica orijinal, furninte impulsa per la educa en la ueste en lingua elinica e aumentante la fortias per tradui eruditia elinica a latina.

La linia entre eruditia elinica e eruditia arabi en Europa ueste ia es multe neblosa en la eda medieval e la eda moderna temprana. Tal, la conseta de la transmete de la clasicas elinica es frecuente usada per refere a la conose coletiva cual ia es otenida de la imperos arabi e bizantian, sin relata con do la conose ia orijina.

Referes[edita | edita la fonte]

  1. Western Civilization: Ideas, Politics, and Society, Marvin Perry, Myrna Chase, Margaret C. Jacob, James R. Jacob, 2008, 903 pages, p.261/262, Google Books webpage: BooksG-kK.