Ting

De Vicipedia
Jump to navigation Jump to search
Un ting germanica, desiniada per un releva en la colona de Marco Aurelio (193 ec)

Un ting ia es un asembla governante de sosias germanica antica, composada de la persones libre de la comunia e presideda par la parlores de la leges. La parola apare en norsce vea, engles vea, e islansce moderna como þing, en engles media e moderna, sason vea, nederlandes vea, e frisce vea como thing, en deutx como Ding, e en norsce, dansce, svensce, faroisce, gutnesce, e norn como ting, tota de protogermanica reconstruida *þingą.

La parola es la orijina ance de la engles parola thing ("cosa") e simil en otra linguas, ma la sinifia orijinal es "un asembla" o "encontra" ma ance "cosa", "ojeto", o "esente". La loca de la ting ia es nomida un þingstede o þingstōw en engles vea. Ance en engles vea, on trova folcgemot ("asembla de la popla"), cual ia es la asendente de la parlamento moderna de la Rena Unida. Oji, la parola continua en la terma engles hustings, en nomes ofisial de legerias e instituis de judi e governa en la nasiones de Scandinavia, e como la parola tyn en la Isola Man per sua tre legerias.

En antica, la ting ia funsiona como e un parlamento e un juderia a niveles diferente de la sosia - local, rejional, e suprarejional. Sua intende ia es per solve disputas e fa desides political, e la locas de tinges ia es ance comun un loca per rituos publica de relijio. Seguente la leges, sola omes libre e matur pote partisipa en la ting, ma fontes scriveda indica ce femes ia es presente a cualce tinges, an si no partisipante en desides.

En la cultur de Scandinavia ante cristiani, la membros de un clan ia es obligada per venja feris contra sua membros mor e mutilada. Donce, vendetas es frecuente la forma la plu comun de deside disputas en la sosia de la vicinges. Ma la ting ia es un strutur jeneral ecuilibrante, usada per redui vendetas e evita desordina sosial en cultures germanica. Los ave un rol importante en sosia vicing como modos de deside, crea alias par sposi, mostra potia, e salda eritas.

En Sveria e England, la asemblas ia aveni a colinetas natural o fabricada, comun tumulos (colinetas de entera). Spesial en Scandinavia, petras de runas multe grande comun sujesta la atenta de un familia local per declara sua supremia, es partes comun de locas de tinges. Lo es ance comun ce locas de tinges es prosima a vias de comunica, como rios navigable e vias mantenida..

La ting ia asembla a periodos periodal, legida, elejeda xefes e res, e judida seguente la lege, cual ia es memorida e resitada par un parlor de la lege, pd la judor. La negosias de la ting ia es presideda par la judor e la xef, conte, o re. Multe studiantes vide la tinges como la asendentes de la instituis de democratia moderna. La Alting de Island es probable la parlamento la plu vea survivente en la mundo, e la Gulating de Noria ance dati de 900 e 1300 ec. An si tinges no ia es asemblas democrata en la sinifia moderna de un corpo elejeda, los ia es construida sirca ideas de neutria e representa, e ia representa efica la interesas de grupos de persones, como familias, casas, clanes, contias, e renas.