Sivilia Minoan

De Vicipedia
Un desinia reconstruinte la palasio a Cnoso, Criti
Un fresco de la sporte minoan de la salta de boves

La sivilia minoan ia es un sivilia ejean de la eda de bronze sur la isola de Criti e otra isolas en la Ejeo, cual ia flori de sirca 2700 a 1600 aec, ante un periodo de declina cual fini sirca 1100 aec. Lo ia presede e ia es asorbada par la cultur misenean de Elas antica. La sivilia es es redescovreda a la comensa de la sentenio 20 par la labora de la arceolojiste brites Arthur Evans. La nom "minoan" deriva de la re mital Minos e ia es sujestea par Evans, ci ia identifia la loca a Cnoso con la mito de la labirinto e la Minotauro. La sivilia minoan ia es descriveda como la plu temprana de sua tipo en Europa, con istoriste Will Durante referente a la minoanes como "la lia prima en la cadena european".

La sivilia minoan es notable spesial per sua palasios grande e estravagante, algas de los con cuatro niveles, con sistemes de tubos detaliosa, e decorada con frescos. La palasio minoan la plu notable ia es lo de Cnoso, seguente par lo de Faisto. La periodo minoan inclui comersia estendente entre Criti e colonias en la Ejeo e Mediteraneo, e spesial con Asia ueste. Par sua mercatores e artistes, la influe cultural de la minoanes estende ultra Criti a la Siclades, la rena vea de Egipte, Cipros e sua cupro, Canan e la costa levante, e Anatolia. Alga de la arte minoan la plu bon es conservada en la site de Acrotiri, sur la isola Santorini, cual ia es destruida par la eruta de la volcan de esta isola.

La minoanes ia scrive xef en la linial A, un silabaria nondesifrada, cual codigi un lingua minoan ipotesal. La razonas per la declina lente de la sivilia minoan, comensante sirca 1550 aec no es clar; teorias inclui invades par la miseneanes de Elas e la eruta major de la volcan de Santorini.