Ratel

De Vicipedia
Jump to navigation Jump to search
Un ratel
Un ratel fema con sua enfante en sua boca
un ratel

La ratel (acc texon mielivor o texon de miel; tasonomia: "Mellivora capensis) es un mamal distribuida tra la plu parte de Africa, e en Asia sude-ueste e Asia sude. Lo ave un estende grande e tolera un varia de ambientes, e no es un spesie menasada par estingui.

Lo es la sola spesies en la jenero Mellivora. An con alga nomes, lo no sembla multe otra spesies de texon. En loca, lo ave un similia anatomial plu con la mustela. Lo es xef un carnivor e ave un cuantia peti de predores car sua pel spesa, fortia, e capasias ferosa en defendes.

La ratel ave un corpo cuasi longa, ma es spesial spesa e larga tra la dorso. Sua pel es notable laxe, e permete ce lo pote torse e turna libre su sua pel. La pel sirca sua colo es 6 mm spesa, un adata per combate, spesial con otra rateles. La testo es peti e plata, con un beco corta. La oios es peti, e la oreas ave sola un cresta - ance un adata per evita dana en combate.

Los ave gamas corta e forte, con sinco ditos sur tota pedes. La pedes es furnida con garas, cual es corta a la gamas posterior e multe longa a la gamas anterior. Rateles es partal plantigrada, con fondos cuxinida e nuda asta la polso. La coda es corta e covreda con capeles longa, esta su la basa.

Rateles es la mustelido african la plu grande. Adultes mesura 55 - 77 cm (sin coda, cual estende 12 - 13 cm), e 23 - 28 cm alta a la spalas. Femas es plu peti ca mases.

Los es xef solitar, ma lo ia es videda en Africa, cooperante con un otra ratel en la curso de xasa e durante la saison de reprodui en maio. Lo usa ance la tuneles vea de oriteropos, facoceros, e an la montones de termitas. Lo es un escavor eselente, capas de escava tuneles en tera dur en 10 minutos.

La ratel es bon notada per sua fortia, ferosia, e durante. Cuando menasada, los pote ata multe savaje e ataca sin teme cuasi tota otra spesies, como leones e ienas. Picas de abeas, spinas de porcospinas, e mordes de otras penetra rara sua pel.