Preistoria de la americanes sude orijinal

De Vicipedia

Arceolojistes crede ce America Sude ia es prima abitada par umanas desedente de la poplas ci ia crusi de Sibir tra Beringia a min 15,000 anios ante aora, e alora ia migra tra America Norde e ultima ia ateni America Sude tra la istmo de Panama.

La evidentes prima per la esiste de umanas en America Sude es datida a sirca 9,000 aec, cuando zuca, txili, e favas ia comensa es cultivada per comedas en la montanias de la basin Amazona. La evidentes de vasos sujeste plu ce manioca, cual resta como un comeda major oji, ia es cultivada tan temprana como 2,000 aec.

Per 2,000 aec, multe comunias cultivante ia es fundada tra la Andes e la rejiones a sirca. Pexa ia deveni un ativia vasta sperdeda longo la costa, e pex ia deveni un fonte importante de nuri. Sistemes de iriga ia es ance developada a esta eda, cual ia aida en la crese de un sosia cultivante.

La cultures de America Sude ia comensa doma lamas, vicunias, e alpacas en la montanias de la Andes sirca 3,500 aec. Estra sua usa como carne e lana, esta animales ia es usada per transporta de benes.

Sivilias pre-european[edita | edita la fonte]

La developa de cultiva e la apare seguente de vilas permanente de umanas ia permete la comensas multiple e supraponeda de la sivilias de America Sude.

Un de la sivilias la plu temprana conoseda ia es a Chico Norde, a la costa sentral de Peru. An si lo ia es un cultur preseramica, la arciteta monumental de Chico Norde ia coaveni con la piramides de Egipte antica. La clase governante de Chico Norde ia comensa un rede de comersia e ia developa cultiva, alora segueda par la txavin per 900 aec, seguente alga estimas e trovas arceolojial. Fabricadas ia es trovada a la loca nomida Chavin de Huantar en Peru a un altia de 3,177 metres. La sivilia ia dura de 900 aec a 300 aec.

En Peru, sirca la comensa de la milenio prima ec, La cultures moche (100 aec - 700 ec a la costa norde) e paracas e nazca (400 aec - 800 ec a la costa sentral) ia flori con statos sentralida e milita permantente, boni cultiva par iriga e developa stilos nova de arte seramica. A la Altiplano, la tiuanacu (o tiahuanaco, 100 aec - 1200 ec, en Bolivia) ia maneja un rede comersial grande fundida sur relijio.

Sirca la sentenio 7, la tiuanacu e la Impero Uari (o huari) ia estenda sua influes a la tota rejion andean, forsante la urbanisme de la Uari e la iconografia relijiosa de la Tiuanacu a la otra poplas.

La muisca ia es la sivilia orijinal major en la area de Colombia oji. Los ia institui la Federa Muisca de multe clanes (cacacazgos), cual ia ave un rede de comersia libre entre se mesma. Los ia es orores de cultivores.

Otra cultures importante pre-european inclui: la caniaris (Cañaris, Ecuador sude-sentral), la Impero Tximu (chimu, 1300-1470 ec, costa norde de Peru), la txatxapoias (Chachapoyas), e la renas aimaran (Aymara, 1000-1450 ec, Boliva ueste e Peru sude).

Con sua capital a la site grande de Cusco, la sivilia de la incas ia domina la Andes de 1438 a 1533. Nomida Tawantin suyu, "la pais de cuatro rejiones" en cetxua, la Impero Inca ia es multe distinguida e developada. Rena par la incas ia estende a cuasi 100 comunias linguistica o etnico, alga 9 a 14 milion persones liada par un sistem de vias de 25,000 km. Sites ia es construis de petra tan esata, lo esede cualce otras, construida tra multe niveles de tereno montanosa. Cultiva en teresas ia es un forma usosa de cultiva

An si la plu de popla de America Sude no ia es capas de resiste la colonistes european, con la tecnolojia de armas e la maladias per cual los no ave imunia, multe ia resiste an tal. La maputxe en Txile sentral e sude ia resiste la colonistes european per plu ca 300 anios en la Gera Arauco.