Preistoria de la Caucasos

De Vicipedia
Un mapa de la Caucasos; nota Armenia e la Plano Armenian a la sude, Sacartvelo (Djordjia) a la ueste, Azerbaidjan a la sude-este, Dagestan e Txetxnia a la norde-este; a la norde-ueste on pote vide la vila de Maicop, Rusia

La preistoria de la Caucasos, como refletada en la arceolojia de la area, comensa flori en la neolitica tarde, la calcolitica, e la Eda de Bronze temprana:

La cultur Shulaveri-Shomu es un cultur neolitica cual ia esiste en la area de moderne Sacartvelo, Azerbaidjan, e Armenia, datida sirca la milenios 6 media e 5 temprana. Lo es distinguida par casas sirculo de brices de fango. La popla ia eleva animales e cultiva sereales. Vasos es decorada con grava, utiles es fabricada de osos, cornos de servos, e osidiana. Lo ia fabrica ance figures de femas, indicante un culto de fertilia.

La cultur Leyla-Tepe es un cultur de Azerbaidjan antica. Sua vilas ia es distribuida sur la inclinas sude de la Caucasos sentral, xef en la distrito Adgam, de 4350 a 4000 aec. La abitantes ia entera sua mor en vasos seramica. La fabricadas de metal ia es sofisticada de la comensa de la cultur, e inclui multe benes de bronze. La cualia de metalurjia ia diminui cuando la cultur Kura-Araxes ia comensa.

La cultur Kura-Araxes ia esiste de sirca 4000 aec a sirca 2000 aec. En alga locas, lo ia desapare tan temprana como 2600 aec. La evidentes la plu temprana de la cultur ia es trovada sur la Plano de Ararat, e ia sperde a norde per 3000 aec, ma no ia ateni Colhis. En tota, la cultur ia inclui un area vasta de sirca 1000 par 500 km, pd la areas moderne de Sacartvelo este, Dagestan, Txetxnia, Inguxetia, Osetia norde, Armenia, Iran norde-ueste, Turcia esta, e tan distante como Suria. La nom de la cultur es derivada de la vales de la Rio Cura e Rio Aras.

La cultur Maicop, sirce 3700 a 3000 aec, ia es un cultur arceolojial major de la Eda de Bronze en la rejion de la Caucasos ueste en Rusia sude. Lo estende de la Penisola Taman a la borda norde de Dagestan, e sude a la Rio Cura. La nom deriva de un entera rial trovada en la curgan de Maicop en la vale de la Rio Cuban.

La cultur Trialeti es nomida per la rejion Trialeti de Sacartvelo, e es datida a la milenio 3 tarde e 2 temprana. Lo ia emerji en la areas de la cultur Kura-Araxes presedente. Lo es notable per sua enteras: La elite ia es enterada en tombas grande e multe rica su montones de tera e petra. Los ia inclui multe ojetos de oro, e a veses caros de cuatro rotas, e ia es la mesma como la enteras de la cultur de curganes.

La cultures de curganes es asosiada con la teoria developada par Maria Gimbutas per la orijina de la popla indoeuropean. La cultur ia es nativa a la stepes norde de la Mar Negra, e no de la Caucasos. Ma la popla indoeuropean ia es multe influeda par la caucasianes, e la caucasianes par la indoeuropeanes.

La cultur Khojaly-Gadabay (sirca 1300 a 600 aec) es un cultur arceolojial de la Eda de Bronze tarde a la Eda de Fero temprana, en la rejion Karabakh de Azerbaidjan sude-ueste e Armenia este.

La Rena de Arme-Shupria (sirca 1300 a 1190 aec) ia es un rena hurian, conoseda tra scrives asirian, locada en la area moderne conoseda como la Plano Armenian, a la sude-ueste de Lago Van, bordante a Ararat mesma. La site capital ia es nomida Ubbumu.

En la sentenios 13 a 9 aec, la nom de la cultur Nairi ia apare en la arcivos asirian e hitita. Lo ia es un confedera de tribus en la Plano Armenian en la visina de Lago Van. La nom es ance usada per nomi la tribus armenian ci abita ala.

La Rena Diauehi (sentenio 12 a 9 aec) ia es un confedera tribal de Anatolia norde-este en la periodo pos-hitita. Diauehi es posible la loca de proto-cartuli.

La cultur colhisan (sirca 1200 a 600 aec) es un cultur de la Eda de Bronze, Eda de Fero de Sacartvelo ueste. Lo ia es partal segueda par la cultur coban en la Caucasos norde e sentral.

La cultur coban (sirca 1100 a 400 aec) es un cultur de la Eda de Bronze tarde e la Eda de Fero de la Caucasos norde e sentral. Lo es nomida per la vileta de Coban, Osetia Norde, a cual axas de gera, dagas, benes decorosa, e otra cosas ia es descovreda en un curgan. La fini de la cultur pare corelata con la estende de la scitianes en la rejion.

La Rena de Urartu (sirca 860 a 590 aec) es la nom de un rejion comun usada per la rena de la Eda de Fero ance conoseda par sua endonim, la Rena de Van, sentrida sirca Lago Van en la Plano Armenian. La lingua scriveda usada par la elite political es urartian, cual apare en cuneforma en Armenia e Turcia este, e es relatada a hurian. Urartu ia flori per du sentenios ante do lo es asorbada par la Impero Median en la sentenio 6 temprana aec, segueda par la concista par la Impero Acemenan.

Con la aveni de scrive, la preistoria de la Caucasos ia deveni istoria.