Patajio

La patajio es un strutur membranosa cual aida un animal en vola o lisca. Lo es trovada en animales esistente e estinguida, incluinte ciroteros, avias, alga dinosauros, mamales, lezardos, e ranas liscante.

En ciroteros, la pel cual formi la surfas de la alas es un estende de la pel de la adomen cual estende a la culmina de cada dito, uninte la gama anterior con la corpo. La patagio de ciroteros ave cuatro partes distinguida:

Propatajio: la patajio estende de la colo a la dito prima.
Datilopatajio: la parte entre la ditos.
Plagiopatajio: la parte entre la dito final e la gamas posterior.
Uropatajio: la parte posterior de la ala entre la du gamas posterior,

En la pterosauros, la patajio ia es composada de la membrana cual formi la surfas de la ala, suportada xef entre la corpo e la dito cuatro longida. Lo ave tre partes distinguida:

Propatajio: la membrana anterior, estendente de la spala a la polso, con un oso unica per suporta lo - la oso pteroide.
Braciopatajio: la surfas xef, estendente de la dito cuatro a la gamas posterior.
Uropatajio: la membrana posterior, estendente entre la du gamas posterior.

La dinosauros Yi e Ambopteryx ia ave patajios simil a los de ciroteros en la gamas anterior. Patajios ia es trovada en la dinosauro Psittacosaurus, cual estende de la talo a la funda de la coda. Alga spesies de Dromaeosauridae ave ance un patajio.

scurales liscante, liscores australian, colugos, anomalures, e otra mamales ave ance patajios estendente entre sua gamas, e posese ance la propatajio e uropatajio. An si la gama anterior no es tan spesialida como en volantes vera, la membrana es ancora un organo complicada, composada de grupos de musculos e fibres variosa. Alga spesies ave osos cual suporta la membrana, a la codo o la polso (en scurales liscante).

En spesies como alga lezardo e ranas liscante, la patajio es un estende de la pel cual funsiona como un paracade plata cual catura la aira per permete lisca.

En alga spesies de papilios, la patajio es un de un duple de organos peti sensante situada a la funda de la alas anterior.

En avias, la propatajio es un plia elastica de pel estendente de la spala a la junta carpal, cual composa la borda inisial de la ala interna.