Omerta
Omerta es un parola italian per un codigo de silentia e onora cual asentua la importa de silentia cuando fasante demandas par autorias o stranjeres, noncoopera con la governa o otra autorias o stranjeres, e iniora intendente e evita jeneral cualce interfere con la ativias nonlegal de otras.
La orijina de la parola "omerta" es debatable. Alga vide lo como desendente de la parola espaniol hombredad ("masia"). Otras sujesta lo deriva de la latina humilitas ("umilia"), cambiada a omerta en alga dialetos de italian sude. La Comite Antimafia prima de la parlamento italian ia aseta, sirca 1970, ce lo orijina en la parola omu ("om") en la lingua sisilian.
La codigo ia orijina e resta comun oji en Italia sude, do banditos e organizas como la Mafia (pe la Camorra, Cosa Nostra, 'Ndrangheta, e Sacra Corona Unita) ia ave un influe forte per sentenios. Codigos simil es trovada en otra areas de la Mediteraneo, incluinte la campania de Espania, Criti, e Corse, tota ce cual ave un cultur simil a lo de Italia sude. Sisilianes ia adota la codigo multe temprana ante la emerji de la Cosa Nostra, e lo es posible ce lo ia es adotada como un modo de resiste sentenios de opresa par la stato e coloni par stranjeres. Lo ia es oservada a min tan temprana como la sentenio 16 como un modo de oposa rena par Espania.
Omerta esiste ance en la SUA, en alga comunias de italian-americanes, spesial en areas do la Mafia ia ave un influe forte, e ance en enclaves etnical de italianes en Deutxland, Canada, e Australia. Codigos de silentia simil esiste en alga visinias de iudi-americanes, elinica-americanes, african-americanes, latina-americanes, e eres-americanes. Venja contra informores es comun en grupos criminal.
La prinsipe fundal de omerta es ce lo no es "masin" per xerca aida de autorias legal per salda cexas personal. La suspeta ce on es un cascittuni ("informor") es la marca la plu mal contra sua masia. Un person ci ia es maltratada es oblidada per garda sua propre interesas par venja acel maltrata par se mesma, o par trova un padron, ma no par depende de la stato. On debe evita asoluta la interfere en la comersia de otras e debe nunca informa autorias de un crimin en cualce situas. Si lo es meritada, on debe venja un ataca a se mesma o sua familia par venja. An si algun es condenada per un crimin ce el no ia fa, el debe aseta sua condena sin dona cualce informa sur la criminor real a la polisia, an si la criminor no es asosiada con la Mafia. En la cultur de la Mafia, la rompe de omerta es punable par mata.
Omerta es un forma estrema de fida e unia en la fas de autoria. Car lo es videda como vergoniosa per tradi an sua enemi la plu perilosa, multe crimines relatada a la Mafia no es solveda. Lo no es clar si omerta es plu bon comprendeda como un espresa de acorda sosial, o si lo es un responde pratical fundida sur teme. Un espresa sisilian dise Cu é surdu, orbu, e taci, campa cent'anni 'mpaci ("El ci es sorda, sieca, e silente va vive un sentenio en pas"). Un otra descrive de omerta dise ce, cualcun ci suplica aida de la autorias egal contra sua camerada es o un fol o un coarde; cualcun ci no pote cura per se mesma sin la proteje de la polisia es ambos.
La Mafia e la conseta de omerta ia entra multe novelas e filmas. La esemplo la plu famosa es la novelas par Mario Puzo, spesial la trilojia The Godfather ("la padrin"), The Sicilian, e Omerta (publicida pos sua mori). Los ia es produida ance como filmas, cual ia gania multe premios per eselentia.