Michelangelo Buonarroti

De Vicipedia
Michelangelo Buonarroti

Informa personal

Nase: Caprese, 6 marto 1475
Mori: Roma, 18 febrero 1564
Pais: Italia

Otra informas

Profesa: Artiste
Move: Renase

Michelangelo (1475–1564) ia es un artiste italian, un de la creores la plu inspirada en la istoria de arte e, con Leonardo da Vinci, la forte la plu impresante en la Renase alta italian. Como scultor, arcitetor, depintor e poesiste, el ia influe vasta sua contemporas e la arte ueste seguente.

Michelangelo ia nase en Caprese, ma sua vive ia relata a la site Firenze. Sua padre, un ofisior ci ia ave contata con la familia renante Medici, ia envia sua fio a la eda de 13 anios a la studio de la depintor florensal Domenico Ghirlandaio. Alora, pos studia a la scola de sculta, Michelangelo ia es invitada en la casa de Lorenzo de' Medici. Sua padron ia mori en 1492: el ia fuji de Firenze cuando on ia esclui tempora la Medicis.

En Roma, el ia produi sua sculta grande Bacchus. El ia crea ance ance Pietà (1498–1500), ancora en sua loca orijinal en la Basilica de San Petro en Roma. Pos reveni a Firenze, Michelangelo ia produi David, la plu famosa de sua scultas jigante de marmo (4,34 m). Creada entre 1501 e 1504, David ia deveni la simbol de Firenze.

En 1505 Papa Julius 2 ia clama Michelangelo per du encargas. La plu importante ia es la frescos de la sofito de la Egleseta Sistina. Entre 1508 e 1512, laborante alta supra la solo e reclinante a sua dorso sur scafal, Michelangelo ia depinta un de la imajes la plu gloriosa de la tempo pasada. El ia inclui un sena de Dio separante la lus de la oscuria, e la crea de Adam. Esta imajes, mostrante sua comprende mestral de anatomia e la move umana, ia cambia la curso de depinta ueste.