Maia (linguas)

De Vicipedia
Jump to navigation Jump to search
La estende de la linguas maia
Un esemplo de la glifos maia

La linguas maia es un familia de linguas parlada par a min ses milion persones maia, spesial en Guatemala, Mexico, Beliz, e Onduras. La familia es un de la familias la plu studiada e documentida en la Americas. Los desende de la lingua protomaia, cual ia es parlada sirca 5000 anios a ante. Lo ia es partal reconstruida usante la metodo de compara. Protomaia ia divideda a, a min, ses ramos, composada de 30 linguas unica.

La linguas maia formi un parte de la linguas de la area nomida Mesoamerica, cual refere a la partes sude de Mexico e la norde de America sentral. La area es definida par la cultures temprana cual comparti multe cualias de cultiva, utiles, relijio, politica, e economia. Los ance comparti multe cualias de la linguas, pe la usa de nomes de relata (como "testo" per "supra") en loca de aposadas, cual ia developa par la interata de poplas per milenias.

La morfolojia de la linguas maia es plu simple ca los de otra linguas mesoamerican, an si lo es ance aglutinante e polisintesal. Verbos es marcada per aspeta o tempo, la person de la sujeto, la person de la ojeto (en la caso de verbos transitiva), e per la plural de person. Nomes poseseda es marcada per la person de la posesor. La nomes no es normal marcada per caso e seso, ma si nesesada, la seso de nomes animada pote es spesifada par un prefisa.

Protomaia es crededa como avente un ordina de parolas verbo-ojeto-sujeto (VOS), con la posible de cambia a VSO en alga casos, como en frases complicada, frases do ojeto e sujeto es de animia egal, e cuando la sujeto es definada. Oji, alga linguas maia continua usa la du, ma otras usa un ordina fisada de VOS o de VSO. Sola un - Txorti - ave un ordina de SVO.

En la eda precolonial de la istoria de Mesoamerica, alga linguas maia ia es scriveda en un scrive logosilabal. Sua usa ia es spesial sperdeda en la periodo clasica de la sivilia maia (sirca 250 - 900). La colie survivente de plu ca 10,000 enscrives conoseda sur construidas, monumentos, vasos, e manoscritos de paper de cortex (combinada con la leteratur maia poscolonial e multe rica, scriveda en la alfabeta latina) furni un funda per la comprende moderne de istoria precolonial sin egal en la Americas.

Vide ance[edita | edita la fonte]