Lydia Maria Child

De Vicipedia
Jump to navigation Jump to search
Child en 1870
Un imaje de la libro An Appeal...
La petra de la tomba de Lydia Maria Child

Lydia Maria Francis Child (11 febrero 1802 – 20 otobre 1880) ia es un aboliste american, ativiste per diretos per femes e per americanes orijinal, noveliste, jornaliste, e oposor de estendisme american.

Sua jornales ia estende a lejores vasta de la desenios de 1820 tra 1850. A veses, el ia xoca sua lejores cuando el ia atenta fasa casos de domina par omes e supremia blanca en alga de sua naras.

An con sua oposores, el pote es recordeda la plu per sua poesia Over the River and Through the Wood ("ultra la rio e tra la bosco", 1844). La casa de sua avis, sur cual el ia scrive de visita, ia es restorada par la Universia de Tufts en 1976 e sta prosima a Mystic River at South Street, en Medford, Massachusetts.

Vive[edita | edita la fonte]

El ia nase con la nom Lydia Maria Francis en Medford, Massachusetts, a 11 febrero 1802, a Susannah Rand e Convers Francis. Sua frate plu vea, ance nomida Convers Francis, ia es educada a la seminario de la scola de Harvard e ia deveni un eglesor unitarian. Child ia reseta sua educa a un scola local e plu tarde a un seminario per femes. A la mori de sua madre, el ia vade abita con sua sore plu vea en Maine, do el ia studia per deveni un ensenior. En sua 20s, el ia vade vive con sua frate e ia encontra multe de la pensores e scrivores la plu bon de la eda tra sua frate. El ia ance converti a unitarianisme.

Child ia leje, par acaso, un article en la North American Review, cual discute la oportunes per novelistes de istoria temprana de England Nova. An ce el ia pensa nunca de deveni un autor, el ia scrive pronto la capital prima de sua novela Hobomok. Corajida par la recomende par sua frate, el ia completi lo en ses semanas e ia publici lo. De esta ora asta sua mori, el ia scrive continuante.

Child ia ensenia per un anio en un seminario en Medford e, en 1824, ia fundi un scola privata en Watertown, Massachusetts. En 1826, el fundi la Juvenile Miscellany, la jornal mensal prima per enfantes publicada en la SUA, e ia supravide sua publica per oto anios. Pos publica otra obras cual vosi sua oposa a sclavia, multes de sua lejores ia comensa oposa el, spesial en la sude de la SUA. La Juvenile Miscellany ia clui pos vendes e suscrives de la libro ia cade.

Child ia ensenia asta 1828, cuando el ia sposi un legiste de Boston, David Lee Child, e ia move a Boston. La ativisme political e envolve en reforma par sua sposo ia introdui el a la reformas sosial de diretos de americanes orijinal e la abolisme de William Lloyd Garrison. Child ia es un ami vea de ativiste Margaret Fuller e un partisipor frecuente en la "conversas" de Fuller a la libreria de Elizabeth Palmer Peabody en Boston.

Child ia mori en Wayland, Massachusetts, con 78 anios, a 20 Otobre 1880, a sua casa a 92 Old Sudbury Road. El ia es interada a la North Cemetery en Wayland. A sua funera, la aboliste Wendell Phillips ia comparti la opina de multe en la promove aboliste ci conose el, "Nos senti ce no fama, no profita, no peril, no malacusa ia ave cualce peso con el."

Scrives temprana[edita | edita la fonte]

Seguente la susede de Hobomok, Child ia scrive novelas, poesias, e un manual de instrui per madres, The Mothers' Book. Ma sua obra la plu susedosa ia es The American Frugal Housewife. Esta libro ia conteni xef resetas, ma ance inclu esta consela per femes joven de casa: "Si tu es comensante mobili un casa, no spende tota tua mone... Comensa umil". Publicada prima en 1829, la libro ia es estendeda e ia ave 33 primidas en 25 anios. Child ia scrive ce sua libro "ia es scriveda per la provre... los ci pote compra per es epicuristes ta trova la informa la plu bon en la 75 Resetas par Eliza Leslie.

En 1831, Child e sua sposo ia comensa identifia se con la promove contra sclavia tra la scrives e influe personal de William Lloyd Garrison. Child ia es ance un ativiste per femes, ma no ia crede ce progresa sinifiante per femes ta debe es atenida asta pos la aboli de sclavia. El ia crede ce femes blanca e sclavos ia es simil en ce omes blanca ia teni ambos grupos en domina e ia trata ambos como propria, en loca de umanas individua. En cuando laborante a egalia per femes, Child ia dise publica ce el no gusta la idea de comunias de sola femes, e ce femes ta pote ateni plu par labora a lado de omes. Child, con multe otra abolistes fema, ia comensa campania per membria e partisipa egal per femes en la American Anti-Slavery Society, cual provoca un controversa cual fende plu tarde la promove.

En 1833, el ia publica sua libro An Appeal in Favor of that Class of Americans Called Africans. Lo razona pro la libri direta de la sclavos sin compensa a la propriores de sclavos. El "ia studia sclavia de un varia de angulos - istorial, political, economial, legal, e moral" per mostra ce "libri es pratica e ce africanes ia ave intelejentia egal a europeanes." En esta libro, el ia scrive ce "la inferioria de intelejentia de la negras es un escusa comun ma multe asurda per prejudi personal." La libro ia es la obra contra sclavia primida prima en America en la forma de un libro. El ia segue lo con alga obras plu peti sur la mesma sujeto. Sua libro ia atrae multe atende, e William Ellery Channing, ci ia atribui a lo un parte de sua interese en la demanda de sclavia, ia pasea de Boston a Roxbury per grasia Child per la libro. Child ia debe dura esclui sosial, ma de esta ora ia es considerada un campion notable de antisclavia.

Child ia aida con labora per fundi la feria prima antisclavia, cual abolistes ia presenta en Boston en 1834. Lo ia es presentada per desenios, organizada su Maria Weston Chapman. En 1839, Child ia es elejeda a la comite esecutante de la American Anti-Slavery Society con Lucretia Mott e Maria Weston Chapman, e ia deveni editor de la National Anti-Slavery Standard, la jornal de la sosia en 1840. En esta periodo, el ia scrive un colona semanal per la jornal nomida Letters from New-York, cual el ia colie e publica plu tarde en la forma de un libro. En sua resta en New York, la Childes ia es amis bon de Isaac T. Hopper, un aboliste cuecer e reformiste de prisones. Pos departe de New York, la Childes ia abita en Wayland, Massachusetts, do los abita per la resta de sua vives. Asi, los furni refuja per sclavos fujinte cual atenta evade la Fugitive Slave Law ("la lege sur sclavos fujinte")

En esta periodo, el ia scrive ance naras corta, esplorante la problemes complicada de sclavia. Esemplos inclui The Quadroons (1842) e Slavery's Pleasant Homes: A Faithful Sketch (1843). E ia usa los per discute problemes de esplota sesal, cual ia afeta ambos la familias de sclavos e propriores de sclavos. En ambos el ia trova femes ci ia sufri de la potia de omes. La plu prosima ce Child ia discute alga de esta maltratas, la plu reatas negativa ce el ia reseta de sua lejores. El ia publica un tese antisclavial, The Duty of Disodedience to the Fugitive Slave Act: An Appeal to the Legislators of Massachusetts, en 1860.

En la desenio de 1850, Child ia responde a la bata cuasi mortal en la Senate de sua bon ami, Charles Sumner, un Senator aboliste de Massachusetts, par un representor de South Carolina, par scrive un poesia The Kansas Emigrants. La comensa de violentia en Kansas entre la colonistes antisclavia e prosclavia, ante vota sur si la teritorio debe es asetada como un stato libre o sclavial, resultante en Child cambiante sua opina sur la usa de violentia. Child ia simpatia ance con la aboliste radical John Brown. En cuando el no ia aseta la violentia zelosa de Brown, el ia amira profunda sua coraje e crede en la ataca en Harper's Ferry.

En 1861, Child ia es invitada per scrive un prefas a un nara de sclavia par Harriet Ann Jacob nomida Incidents in the Life of a Slave Girl. El ia aida edita la obra per publica esta anio, e ia suportada efortas per gaina atende per vende de la libro, ma la obra ia es inondada par la comensa de la Gera Interna American.

La diretos de americanes nativa[edita | edita la fonte]

Child ia publica sua novela prima, un istoria romantica Hobomok, A Tale of Early Times, su un pseudonim neutral "un american". La trama ia sentrida sur la sposi interasal entre un fem blanca e un om american orijinal, ci ave un fio con lunlotra. La fem resposi plu tarda, reintegra se e sua fio a la sosia puritan. La idea de un sposi entre rasas ia causa un scandal en la comunia de leteratur e la libro no ia es un susede per la criticores.

En la desenio de 1860, Child ia scrive libretas sur la diretos de americanes orijinal. La plu notable, An Appeal for the Indians (1868), ia demanda de ofisiales governal e xefes relijiosa per trae justa per la americanes orijinal. Lo ia contribui a la fundi de la Board of Indian Commissioners e la Peace Policy seguente en la governa de Ulysses S. Grant.

Pensa libre[edita | edita la fonte]

Con un padre sever calviniste, Child ia dormi con un biblio su sua cusin cuando el ia es joven. Ma, an si ia alia se con la unitarianes en 1820, como un adulte el no ia es ativa en acel o cualce otra eglesa. En 1855 el ia publica la tre volumes The Progress of Religious Ideas Through Successive Ages, en cual el ia rejeta teolojia, dogmas, e dotrinas tradisional, e ia nega la conseta de revela e credes como un funda per la ata moral, razonante en loca ce "Lo es no posible per esajera la labora mal ce teolojia ia fada en la mundo" e, en comentante sur la labores de teolojistes "Cual un paradiso florinte ta es la tota tera si la mesma cuantia de intelijentia, labor, e zelosia ia es spendeda sur siensa, cultiva, e la artes!"