Linguas oto-mangean

De Vicipedia
Jump to navigation Jump to search
Un mapa de la linguas oto-mangean

La linguas oto-mangean es un familia grande composada de alga sufamilias de linguas nativa de la Americas. Tota linguas oto-mangean parlada aora es en Mexico, ma orijinal la ramo mangean, aora estinguida, ia es parlada tan sude como Nicaragua e Costa Rica.

La linguas con la cuantia la plu grande de parlores de esta familia oji es trovada en la stato de Oaxaca, do la du ramos la plu grande, la linguas zapotecan e linguas mextecan, es parlada par cuasi 1.5 milion persones combinada. En Mexico sentra, spesial en la statos Hidalgo e Queretaro, la linguas de la ramo oto-pamean es parlada: la otomi e la mazahua, prosima relatada con lunlotra, ave plu ca 500,000 parlores combinada.

Alga linguas oto-mangean es multe menasada par estingui; per esemplo, ixcatec e matlatzinca ave cada min ca 250 parlores, de cual la plu es vea. Otra linguas, spesial de la ramo mangean ia es ja estinguida; estas inclui la lingua txapanec, cual ia es resente declarada estinguida. Otras, como subtiaba, prosima relatada a tlapanec, es sola conoseda de descrives de la sentenio 20 temprana.

La familia oto-mangean es la familia la plu diversa e la plu vasta jeografial representada en Mesoamerica. La diversia interna es comparable con lo de la linguas indoeuropean, e la proto-oto-mangean es estimada como parlada a alga tempo ante 2000 aec. Esta sinifia ce, a min per la 4000 anios presedente, linguas oto-mangean ia ave coesiste con la otra linguas de Mesoamerica e ia developa multe cualias comun con los, a un estende ce los es videda como un sprachbund (comunia de linguas con alga similias ma no vera relatada) nomida la area linguistica mesoamerican.

An tal, oto-mangean es ance distinguida de otra familias de linguas mesoamerican en alga cualias: Lo es la sola familia de linguas en tota America Norde de cual sua membros es tota linguas tonal. Lo es ance marcada par un strutur analisal multe plu completa ca la otra linguas mesoamerican. Un otra cualia es ce cuasi tota de sua membros mostra un ordina de parolas VSO (verbo-sujesto-ojeto), como la linguas semitica, celtica, e polinesian.

Alga de la linguas oto-mangean ave sistemes de parla sibilada, en cual informa pote es transmeteda par sibila la combinas de tonas de parolas e frases, sin la usa de parolas. Parla sibilada es spesial comun in la linguas txinantec, mazatec, e zapotec.