La calendario con un semana completinte

De Vicipedia
Jump to navigation Jump to search

Entre la reformis diversa de la calendario gregorian, la plu resente es la calendario con un semana completinte.

La calendario de Mundo no pote conveni car lo rompe la continuantia de la semana par la nesesa de un o du dias estra la semana. Plu, la norma ISO 8601 ia ofisiali la anios de 52 o 53 semanas. Donce en loca de ajunta un o du dias a la 52 semanas, on prefere ajunta un semana completa pos 6 o 5 anios.

On ave proposas variosa per la distribui de la semanas en la anio. La plu simple es la sutrae de la idea de mense. La anio conteni 4 trimestres con 13 semanas en cada trimestre. Esta ta es simil a la calendario saisonal, ma con la ajunta de un semana per cada grupo de 6 o 5 anios en loca de un dia per cada anio, con un plu dia per cada grupo de 4 anios.

Ma si on vole conserva la idea de mense, alora on pote deside ce, en un trimestre, 2 menses ave 4 semanas e sola un mense ave 5 semanas. La ordina pote es 5 - 4 - 4 per cada trimestre en un anio normal, e 5 - 4 - 5 per la trimestre ultima de un anio con 53 semanas.

Ma si un mense ave 28 o 35 dias, alora los no va coresponde plu con la menses tradisional. Ma cisa esta no importa.

Un otra solve es la usa de nomes nova per la menses nova. On ave un proposa nomida "the Hermetic Leap week Calendar" con nomes nova per la menses, cual es nomes de stelas.

Un posible plu cauta es la usa de menses cuasi tradisional, como en la Calendario de Hanke-Henry, con la ajunta, per cada grupo de 6 o 5 anios, de un semana autonom entre desembre e janero. Nomes como "Pax", "Newton", "Tychon", e "Xtr" ia es sujesteda per esta semana.

Un otra posible es la proposa fada par Clint Anderson con la nom "pragmatic calendar" (calendario pratical). En esta calendario la 7 dias de la semana completinte es distribuida en 7 menses. Tal, cada dia aveni en un mense, e la mense ave o 30 o 31 dias. En la anios con 52 semanas, la longia de la menses es tal: janero 31 dias, febrero 30, marto 30, april 31, maio 30, junio 30, julio 31, agosto 30, setembre 30, otobre 31, novembre 30, desembre 30. En la anios con 53 semanas, cada mense ave 31 dias con la eseta de febrero cual resta con sua 30 dias. Donce on ave 11 menses con 31 dias, e un mense con 30 dias, produinte un anio con 371 dias o 53 semanas.

Calendarios como esta ave du problemes: Prima, la data per solstisios e ecuinotes varia par tan multe como 7 dias tra la anios. Du – e sosial plu importante – aniversarios cual aveni en la semana autonom no aveni a plu ca un ves en 6 o 5 anios.

Un discute detaliosa par la astronomiste txesce Josef Šuráň pote es videda asi.