Istoria temprana de Scandinavia
La istoria temprana de Scandinavia es la istoria de la rejion jeografial de Scandinavia e sua poplas. La rejion es en Europa norde, e es composada de Danmarc, Noria, e Sveria. Suomi e Island es comun incluinte.
No multe cosas resta en Scandinavia de la eda de petra, la eda de bronze, o la eda de fero, estra cuantias limitada de utiles creada de petra, bronze, e fero, alga joalas e ornas, e tombas de petra. Un colie importante cual esiste es la colies vasta e rica de desinias en petra nomida par arceolojistes como petrogrames.
La paleolitica[edita | edita la fonte]
En cuando la jelo retrosede, renos ia come sur la tereno plata de Danmarc e Sveria sude. Esta ia es la tera de la cultur Ahrensburg, tribus ci ia xasa sur teritorios vasta e abitada en lavvus (tipis no tro alta, cual susta la ventas forte de la planos de tundra. On ave poca foresta en esta rejion estra per la betules blanca e sorbos, ma la taiga ia apare lente.
La mesolitica[edita | edita la fonte]
De sirca 9000 a 6000 ante aora, Scandinavia ia es poplada par grupos nomada o semifisada, sirca ci poca es conoseda. Los ia susta se par xasa, pexa, e colie. Sirca 200 locas de entera ia es investigada en la rejion de esta periodo de 3000 anios.
De edas preistorial, la popla sami de Europa artica ia abita en un area cual estende de partes de Scandinavia norde e la penisola Kola en Rusia. Los ia abita la partes artica e suartica de la area per a min 5000 anios. Petrogrames e otra trovas arceolojial como vilas, de la paises tradisional de la sami, ia es datida de sirca 10,000 ante aora. Esta xasores e coliores de la paleolitica tarda e mesolitica temprana ia es nomida la komsa par rexercores, ma cual la komsa ia nomi se mesma no es conoseda.
En la milenio 7 aec, cuando la renos e sua xasores ia move a Scandinavia norde, forestas ia fundi se sur la tera. La cultur maglemosian ia abita en Danmarc e Sverria sude. A la norde, en Noria e la plu de Sveria sude, ia abita la cultur Fosna-Hansbacka, ci ia abita xer longo la borda de la foresta. La xasores e coliores de la norde ia segue la manadas e la cursos de la salmones, movente a sude en la invernos, movente ancora a norde en la estates. Esta poplas temprana ia segue tradisiones simil a los de popla tra otra rejiones de la norde distante - areas cual inclui Suomi moderna, Rusia, e ultra la streto Bering en la banda la plu norde de America Norde.
En la milenio ses aec, Scandinavia sude ia es covreda con forestas de arbores caduca e miscada. Animales ia inclui uros, bisones, alce, e servos roja. La cultur Kongemose ia domina en esta periodo. Los ia xasa focas e pexa en la acuas rica. Norde de la popla kongemose ia abita otra xasor-coliores en la plu de Noria sude e Sveria, nomida la cultures Nøstvet e Lihult, desendentes de popla fosna-hensbacka. Prosiminte la fini de la milenio ses aec, la cultur Kongemose ia es recambiada par la cultur Ertebølle en la sude.
La neolitica[edita | edita la fonte]
En la milenio sinco aec, la popla ertebølle ia aprende la fabrica de vasos de tribus visina en la sude, ci ia comensa cultiva e doma animales. Los ia comensa cultiva la tera ance, e par 3000 aec, los ia deveni un parte de la cultur de vasos embutin megalito. En la milenio cuatro aec, esta tribus de vasos embutin ia estende se en Sveria asta Uppland. La nøsvet e la lihultes ia aprende la tecnolojia nova de la cultivores avansante - ma no cultiva - e ia deveni la cultur de vasos perforada. Esta tribus ia para la avansa de la cultivores e forsa los a sude a Sveria sude-ueste, ma alga siensistes sujesta ce la cultivores ci no ia es matada o forsada a via, ma ce los ia lia volente con la cultur de vasos perforada e ia deveni un parte de los. A min un vila pare como un popla miscada: la casa sur palos de Alvastra.
Nun conose cual linguas esta scandinavianes temprana ia parla, ma prosiminte la fini de la milenio tre aec, los ia es invadeda par tribus visina de la sude ci, multe siensiste crede, ia parla protoindoeuropean, la cultur de la axa de gera. Es popla nova ia avansa a Uppland e la Oslofjord, e lo ia es (posible) la parlores de la lingua cual ia es la asendente de la linguas moderna. Los ia es pastores de boves, e con los, la plu de Scandinavia sude ia entra la neolitica.
Eda de bronze nordica[edita | edita la fonte]
An tal la scandinavianes ia junta la cultures european de la eda de bronze alga tarda par comersia, la locas scandinavian furni ojetos rica e bon conservada, fabrica de lana, lenio, e bronze e oro importada de Europa sentral. En esta periodo, scandinavianes ia adota multe simboles sentral european e mediteranean a la mesma tempo en cual los ia crea stilos e ojetos nova. Elas mesenean, la cultur Villanovan, Fenisia, e Egipte antica ia es crededa como fontes de influe en la artes scandinavia de esta periodo. La influe stranjer es crededa como orijina de la comersia de ambar, e la ambar trovada en enteras mesenean de esta periodo ia orijina de la Mar Baltica. Alga petrogrames mostra barcones, e la formas de petras grande conoseda como barcones de petra, indica ce barcones ia ave un rol importante en la cultur. Alga petrogrames ia inclui barcones cual es posible mediteranean,
De esta periodo, on ave multe montones e campos de petrogrames, ma sua sinifias ia es perdeda. On ave ance multe fabricadas de bronze e oro. La aspeta primitiva de la petrogrames, comparada con la obras en bronze, ia condui a un teoria ce los ia es produida par cultures diferente o grupos sosial diferente. No lingua scriveda ia esiste en Scandinavia en la eda de bronze.
La eda de bronze nordica ia es marcada par un clima tepida (simil a lo en la mediteraneo), cual ia permete un cuantia de popla relativa densa, ma lo ia fini con un cambia de clima composada de un clima plu moiada e fria, e lo pare multe probable ce la clima ia forsa la tribus germanica a sude en Europa continental. En esta periodo, on ave influes scandinavian en Europa este. Un mil anios plu tarda, la multe tribus germanica este cual ia declara orijinas en Scandinavia (la burgundas, la gotos, e la herules), e otras, como la lombardes, ance, ce Scandinavia ia es nomida par alga scrivores, como Jordanes en sua obra Getica, como "la utero de nasiones"
La eda de fero pre-roman[edita | edita la fonte]
Esta ia es ance la periodo cuando la tribus germanica ia deveni conoseda par la mundo mediteraneo e la romanes. En 113 - 101 aec, du tribus germanica de Jutland (en Danmarc de oji) ia ataca la Republica Roman en cual es aora conoseda como la Gera Cimbrian. Esta du tribus, la cimbri e la teutones, ia aplica la perdes la plu grande cual Roma ia sufri de la Gera Punica 2. Ma la cimbris e la teutones ia es ultima vinseda par la lejiones roman.
A la comensa, fero ia es valuada e usada per decora. La ojetos la plu vea ia es agos, ma spadas e falxetas ia es ance trovada. Bronze ia continua es usada en tota la periodo, ma ia es usada xef per decora. La tradisiones ia es un continua de la eda de bronze nordica, ma on ave influes forte de la cultur Hallstatt en Europa sentral, posible un cultur celta. Los ia continua con la tradisiones de la cultur de campos de vasos de arde la morida e pone la restas en vasos. Den la sentenios final, influes de la cultur La Tene de Europa sentral ia sperde a Scandinavia de Deutxland norde, e on ave trovas de esta periodo de tota provinses de Scandinavia sude. De esta tempo, arceolojistes ia trova spadas, decoras de scermos, testas de lansas, sisores, falxetas, pinses, coteles, agos, fibias de sintures, calderas, etc. Bronze ia continua es usada per torces e calderas, de un stilo de cual es un continua de la eda de bronze. Un de la trovas la plu interesante es la vagon Dejbjerg de Jutland, un vagon con cuatro rotas de lenio, con partes de bronze.
Eda de fero roman[edita | edita la fonte]
En cuando multe tribus germanica ia susta contata continuada con la cultur e la esiste de la militar de la Impero Roman, multe de Scandinavia esiste a la periferia estrema de la mundo estrema. Con la eseta de referes corta a la suiones (svensces) e la gautoi (geates) la plu de Scandinavia ia resta nonrejistrada par autores roman.
En Scandinavia, on ave un importa grande de benes, como monetas (plu ca 7000), vasos, imajes de bronze, tasones de vitro, fibias esmaltida, armas, etc. Plu, la stilo de ojetos de metal e vasos de arjila ia es clar roman. alga ojetos ia apare per la ves prima, como sisorones e peones.
On ave alga multe corpos de la pantanes torbosa de esta periodo en Danmarc, Schleswig, e Sveria sude. Con la corpos, on ave armas, benes de casa, e vestes de lana. Barcones grande de remos ia es trovada de la sentenio cuatro en la pantanes de Nydam en Schleswig. Multe ia es enterada sin arde, ma la tradision de arde ia regania sua popularia plu tarda.
Tra la sentenios sinco e ses, oro e arjento ia deveni plu comun. Multe de esta pote es esplicada par la saca de la Impero Roman par tribus germanica, de cual multe scandinavianes ia reveni con oro e arjento
Eda de fero germanica[edita | edita la fonte]
Esta periodo segue la cade de la Impero Roman, e es divideda entre la periodo temprana e la periodo tarda, cual es conoseda como la eda Vendel en Sveria, con enteras rica en la basin de Lago Malaren. La periodo temprana es la periodo en cual la dansces apare en istoria, e, seguente Jordanes, los ia es de la mesma popla como la svensces (suehans, suetidi), e ia repone la herules.
En la cade de la Impero Roman, on ave un abunda de oro cual ia flue a Scandinavia, e on ave obras eselente en oro de esta periodo. Oro ia es usada per fabrica montures per portaspadas e brateas (ornas sirculo); esemplos notable es la cornos de oro de Gallehus.
Pos la desapare de la Impero Roman, oro ia deveni rara e la scandinavianes ia comensa fabrica ojetos de bronze dorada, con decoras de animales entretexeda en la stilo scandinavian. La eda de fero germanica temprana, decoras ia mostra animales cual es desiniada con anatomia esata, ma en la eda de fero germanica tarda, los ia evolui a formas detaliosa con entretexeda membros bon reconoseda de la eda de vicinges.