Impero de Alexandro

De Vicipedia
La avansas de Alexandro la Grande e la estende masima de sua impero

La Impero de Alexandro ia es un impero macedonian cual inclui Elas e un parte grande de Asia sude-ueste. Lo ia dura sirca des anios.

Ante la sentenio cuatro aec, Macedonia ia es un rena peti estra la area dominada par la site-statos grande de Atina, Sparta, e Teba, e per un periodo corta, dominada par la Impero Acemenan. En la rena de re Filipo du de Macedonia (359–336 aec), Macedonia ia domina Elas continental e Tracia par concista e diplomatia. Con un armada reformida conteninte falanjes brandinte lansias sarissa, Filipo ia concista la potias vea de Atina e Teba en la Batalia de Ceronea en 338 aec. Alexandro la Grande, la fio de Filipo, como comandor de un federa de statos elinica, ia reali la intende de sua padre per comanda tota Elas cuando el destrui Teba pos ce la site ia rebela.

En la campania seguente, Alexandro ia vinse la Impero Acemenan e la teritoria cual estende a la Rio Indo. Per un periodo corta, sua impero ia es la plu potiosa en la mundo. Lo ia es la stato elinica defininte, comensante la comensa de un periodo nova de la sivilia de Elas antica. Artes e leteratur elinica ia flori en la paises concistada, e avansas en filosofia, injenia, e siensa ia sperde tra multe de la mundo antica. De importa spesial ia es la scrives de Aristotele, la ensenior privata de Alexandro, cual deveni la funda de filosofia de la ueste.

Pos la mori de Alexandro en 323 aec, la Geras de la Diadocos, e la divide de la impero, Macedonia ia resta como un sentro cultural e political en la rejion mediteraneo, con la Impero Ptolemean, la Impero Seleucan, e la Rena de Pergamon. La declina de Macedonia ia comensa en la eras Macedonian e la asende de la Impero Roman como la potia xef de la Mediteraneo. A la fini de la Gera Macedonian tre en 168 aec, la monarcia de Macedonia ia es abolida, e ia es recambiada par statos-clientes. Pos un plu gera e corta periodo de revive, Macedonia ia deveni un provinse de la Impero Roman en 148 aec.