Holger la dansce
Holger la dansce (conoseda en franses como Ogier le Danois) es un cavalero lejendal de Carlo la grande ci apare en multe cantas de eroes en franses vea. Spesifada, el es la eroe en La chevalerie Ogier (~1220), de la Geste de Doon de Mayence. La parte prima de la epica, sur la enfantia de Holger, es marcada par sua duel contra un sarasen, de ci el ia oteni la spada Cortana, seguente par un vinse sur un otra sarasen de ci el ia gania la cavalo Broiefort. En partes seguente, Holger ia deveni un rebelor ci ia demanda refuja con la re de Lombardia e ia combate Carlo la grande per multe anios, asta cuando el ia reconsilia cuando el ia es nesesada per combata un otra invade sarasen.
Sua carater es un composa fundida sur un person istorial, Autchario Franco, ci ia es aliada con Re Desiderio de Lombardia contra Carlo la grande. La lejenda de un om Othgerio (enterada en Meaux) es ance corporada e la nara. En Scandinavia, el ia es prima conoseda como Oddgeir danski en la tradui a norsce vea de la saga Karlamagnús, ma plu tarda ia deveni conoseda plu comun como Holger Dansce e ia es miscada con Olaf, fio de Re Gøtrik, en un tradui dansce de la sentenio 16. El ia deveni un eroe de folclor dansce, con la motif de la eroe dorminte liada a el.
En un modo simil a Frederico Barbarosa, San Vaslav, e Re Artur, Holger en la lejenda dansce, deveni un "re en la monte". On dise ce el abita la castel de Kronborg, sua barba creseda a sua pedes. El va dormi ala asta un dia en cuando la pais de Danmarc es perilida, a cual ora el va sta e salva la nasion.