Hex

De Vicipedia
Jump to navigation Jump to search
Un jua de hex, ganiada par la juor de blanca

Hex es un jua de stratejia juada sur un grilia de esagones, tradisional un rombo de 11 par 11, ma ance juada sur tables de 13 par 13, 14 par 14, o 19 par 19. Juores pone pesos, tipal negra e blanca, en turnos sur la spasios vacua en un atenta per lia sua lados oposante de la table en un cadena completa. Un juor debe gania - on no pote ave finis egal. La jua nesesa un stratejia profonda, taticas agu, e un funda profonda matematical.

La jua ia es inventada par la matematiciste dansce Piet Hein, ci ia introdui lo en 1942 a la Institui Niels Bohr. Hein ia nomi lo Con-tac-tix, ma lo deveni conoseda en Danmarc como poligon, seguente un article par Hein en la jornal dansce Politiken, en cual el ia usa acel nom. La jua ia es reinventada autonom en 1948 par la matematiciste John Nash a la Universia de Princeton. Seguente Martin Gardner, ci ia scrive sur hex en sua article en Mathematical Games en 1957, la juores con Nash ia nomi la nom o Nash o John, con la nom du referente a la fato ce la jua pote es juada sur la telias esagon de la solo de un sala de banio (en jergo engles, la "John"]]. En 1952, la compania Parker Brothers ia introdui la jua, e nomi lo Hex, cual resta la nom plu comun.

Cada juor ave sua color, tipal blanca o negra, o roja e blu. Los prende turnos de pone un peso de sua color sur un esagon de la table. Pos pone un peso, lo no pote es moveda, caturada, e sutraeda de la table (simil como go). La gol per ambos juores es per formi un via juntada de sua propre pesos liante la lados oposante de la table, marcada par sua colores, ante sua oposor lia sua lados en la mesma modo. La juor ci completa sua lia prima es la ganior. Nota ce la 4 esagones a la cantos parteni a ambos juores.

Car la juor prima de la jua ave un vantaje, la regula normal usada es per permete la juor du per eleje si el vole cambia con la juor prima pos cual la juor prima ia fa sua turno prima.

Un varia, nomida Y, es la mesma jua juada sur un grilia triangulo de esagones. La gol es ce un juor lia tota tre lados de la triangulo.

Un otra varia, cual es plu complicada, es havannah. Lo es juada sur un grilia esagon de esagones. La gol es ce un juor completa un de tre motifes: un anelo, un cadena entre du de la cantos de la table, o un cadena cual lia tre lados de la table (no incluinte la cantos).