Governa de Roma antica

De Vicipedia
Jump to navigation Jump to search

Inisial, Roma ia es renada par res, ci ia es elejeda de cada de la tribus major de Roma en serie.[1] La natur esata de la potia de la re no es clar. Cisa el ia ave un potia cuasi asoluta, o ia es cisa mera la dirijor xef de la Senato e la popla. A la min sur temas militar, la autoria de la re (imperium) ia es probable asoluta. El ia es ance la xef de la relijio ofisial. En ajunta a la autoria de la re, on ia ave tre asemblas dirijal: la Senato, cual ia consela la re; la Comitia Curiata, cual ia pote validi leges proposada par la re; e la Comitia calata, cual ia es un asembla de la scola de pretes cual ia pote asembla la popla per atesta atas, escuta proclamas, e declara la program de festas per la mense veninte.

Representa de un consenta de la Senato roman: Cicero ataca Catilina, de un fresco de la sentenio 19.

La batalias entre la clases de la Republica roman ia crea un misca nonusual de democratia e oligarcia. La parola "republica" veni de la espresa latina res publica, de cual sua tradui leteral es "conserna publica". Tradisional, leges roman ia es asetable sola par un vota de la asembla poplal (Comitia tributa). Simil, aspirores per postos publica ia debe ofre se per es elejeda par la popla. An tal, la Senato roman ia representa un instituida oligarcial, cual ia funsiona como un comite conselante.

En la Republica, la Senato ia ave autoria vera (auctoritas), ma no potia vera de legi; lo ia es tecnical mera un comite conselante. An tal, car la senatores individua ia es multe influosa, on no ia pote fasil reali cualce cosa oposada par la vole coletiva de la Senato. Senatores nova ia es elejeda de entre la aristocratas par sensurores (censura), ci ia pote ance despone un senator de sua posto si on ia judi ce el es "moral malida" – un alega cual ia pote inclui sobornas o an, como su Cato la Vea, abrasas de sua sposa en publica. Plu tarda, entre la reformis par la autocrata Sulla, la quaestores ia deveni automata membros de la Senato, an si la plu de esta reformis no ia survive.

La Republica ia ave no burocratia fisada, e ia asinia a grupos privata la taxe de colie impostas. Postos governal, como quaestor, aedilis e prefeto, ia es finansiada par la ricia privata de la ocupor de la posto. Per preveni ce cualce sitadan gania tro multe potia, judores nova ia es elejeda a cada anio e ia debe divide sua potia con un colaboror. Per esemplo, en situas normal, la autoria la plu alta ia parteni a du consules. En un crise, on ia pote nomi un autocrata tempora. Tra la Republica, la sistem dirijal ia es revisada a veses diversa per segue esijes nova. A fini, lo ia mostra se como nonconveninte per controla la domina sempre cresente de Roma, tal contribuinte a la fundi de la Impero Roman.

En la temprana de la Impero, on ia conserva la finje de un forma republical de governa. La imperor roman ia es representada como sola un princeps o "sitadan prima", e la Senato ia reseta la potia de legi e tota autoria legal cual ia parteni a la asemblas poplal a ante. An tal, la rena de la imperores ia deveni sempre plu autocrata, e la Senato ia es reduida a un comite conselante, asiniada par la imperor. La Impero no ia erita un burocratia fisada de la Republica, car la Republica ia ave no strutures governal permanente, con eseta de la Senato. La imperor ia nomi aidores e conselores, ma multe instituidas ia manca a la stato, como per esemplo un proposa finansial sentral projetada. Alga istoristes ia sita esta como un causa major de la declina de la Impero Roman.

Referes[edita | edita la fonte]

  1. Matyszak, 2003. pajes 16–42.