Relijio en Roma antica
Su relijio en Roma antica, on comprende la relijio etnical de la asendentes de la site de Roma, e ance la praticas relijiosa adotada de poplas concistada. La romanes ia es multe relijiosa, e ia atribui sua susede como potia global a sua relijiosia coletiva (pietas) par cual los ia manteni relatas bona con la dios.
Longo la lejendas, la plu de la instituidas roman ia pote es segueda asta sua fundores, spesial Numa Pompilio, la re du de Roma, ci ia negosia direta con la dios. Esta relijio anticin ia es la fundi de la mos maiorum (la "via de la asendentes" o simple "tradision"), videda como sentral per la identia roman.
Cuando Roma ia contata cultures stranjer, e ia concista los, la relijios stranjer ia atrae sempre plu adorores roman, de ci sua asendentes ia veni sempre plu de otra partes de la Impero. La imperores ia promove la culto imperal tra la Impero, e esta (como ance relijios misterial importada) ia es jeneral praticada a lado de la relijio ofisial. Ultima, la politeisme roman ia fini con la adota de cristianisme como relijio ofisial de la Impero.