Eda medieval en England

De Vicipedia
Jump to navigation Jump to search
Con la orolojio, de alta a sinistra: Detalia de la Tapeto imajal de Bayeux, mostrante Harold Godwinson; vitro colorida de la sentenio 15 de York Minster, mostrante un sena de la Apocalise; catedral de Salisbury, construida en la sentenio 13; la Bol de Ormside, de la sentenio 9.

La eda medieval en England conserna la istoria de England en la eda medieval, de la fini de la sentenio 5 asta la comensa de la eda moderna en 1485. Cuando England ia emerji pos la cade de la Impero Roman, la economia ia es laserada e multe vilas e sites ia es abandonada. Pos alga sentenios de migra germanica, identias e cultures nova ia comensa emerji, developante renas xasante cual ia compete per la potia. Un cultur artal rica ia flori con la anglosasones, produinte poesias epica como Beowulf e arte de metal sofisticada. La anglosasones ia converti a cristianisme en la sentenio 7, e un rede de moncerias ia es construida tra England. En la sentenios 8 e 9, England ia es atacada par la vicinges, e la luta ia dura tra multe desenios, instituinte Wessex como la rena la plu potiosa e promovente la crese de un identia engles. An con la crises repeteda de pasa de rena e la prende de potia dansce en la comensa de la sentenio 11, en la desenio de 1060 England ia es un stato potiosa e sentrida con un economia susedosa.

La invade normande de England en 1066 ia indui la defeta e la sustitui de la elejedas anglosason par la nobiles franses e normande e sua suportores. William la concistor e sua seguores ia emprende la sistem statal esistente, ia represa la revoltas local e ia controla la abitores par un rede de casteles. La renores nova ia introdui feudalisme a la governa de England, eliminante sclavia ma creante campanianes feudal. En la sentenios 12 e 13, la cuantia de abitores de England ia dupli, nurinte la crese de la vilas e sites e de la comersia, aidada par la temperatur plu calda en Europa norde. Un onda nova de moncerias ia es constituida, ma reformis eglesal ia crea tensa entre la res e la arcibispos. An con la developas en la governa de England e la sistem legal, la lutas entre la elejedas anglosason-normande ia causa geras internas multiple e la perde de Normandia.

En la sentenio 14, England ia esperia la Famion Grande e la Mori Negra, du avenis desastrosa cual ia dui la cuantia de abitores, lasante la economia en caos en suminante la ordina political vea. Turbas sosial ia segue, en la forma de revoltas campanian de 1381. Entretempo la cambias en la economia ia causa la emerji de un clase sosial nova, la burjesia, e la nobilia ia comensa eserse potia tra un sistem nomida feudalisme basida. Cuasi 1500 vilas ia es abandonada par sua abitores e multe omes e femes ia xerca oportunes nova en la vilas e sites. Tecnolojias nova ia es introduida, e England ia produi alga de filosofistes e siensistes natural la plu grande de la eda medieval. La res engles en la sentenios 14 e 15 ia reclama la trono de Frans, provocante la Gera de Sento Anios. A veses England ia ave un militar grande, con economia cresente par la profitas de la comersia internasional de lana e de vestes, ma en 1450 la pais ia es en crise, frontinte fali militar con Frans e un retrosede economial corente. Plu turbas sosial ia aveni, segueda par la Gera de la Rosas, fada entre du partitos oposante de la nobilia engles. La vinse de Henry 8 en 1485 marca la fini de la eda medieval en England e la comensa de la eda moderna.