Diamante
Diamante es un forma solida de la elemento carbono con sua atomes ordinada en un strutur cristal. Diamante como un forma de carbono es un solida sin sabor, sin odor, forte e frajil cual es transparente en color, un condutador povre de eletrica, e nondisolvable en acua. Un otra forma solida de carbono conoseda como grafito es la forma cimical stable de carbono a temperatur e presa de sala, ma diamante es metastable e converti a lo a un rapidia nonpersepable en acel ambiente. Diamante ave la dura e condutia termal la plu alta de cualce materia natural, cualias cual es usada en aplicas industrial major como utiles de talia e poli. Los es ance la razona ce selulas de inco de diamante pote pone materias su presas trovada profonda en la Tera.
Car la ordina de atomes en diamante es estrema rijida, poca tipos de nonpures pote contamina lo (du esetas es boro e nitrojen). Cuantias peti de defetos o nonpures (sirca un per milion de atomes de la rede) pote colori un diamante a blu (boro), jala (nitrojen), brun (defetos), verde (esposa a radia), purpur, rosa, orania o roja. Diamante ave ance un indise de refrata multe alta e un sperde otical relativa alta.
La plu de diamantes natural ave edas entre un bilion e 3,5 bilion anios. La plu ia es formida a profondias entre 150 e 250 cilometres en la litosfera de la Tera, an si alga ia veni de un profondia de asta 800 cilometres. Su presa e temperatur alta, fluentes conteninte carbono ia disolve minerales diversa e ia recambia los con diamantes. Multe plu resente (sentos a deses de milion anios ante aora), los ia es portada a la surfas en erutas volcanal e deponeda en rocas magmal conoseda como cimberlitos e lamproitos.
Diamantes sintesal pote es creseda de carbono de puria alta su presas e temperatures alta o de gases idrocarbonal par deponeda cimical de vapor (DCV). Diamantes de imita pote ance es fabricada de materias como diosido de zirconio cubo e carbido de silico. Diamantes natural, sintesal e de imita es la plu comun distinguida usante tecnicas otical o mesuras de condutia termal.