Dia de Gustavo Adolfo

De Vicipedia
Jump to navigation Jump to search
Tortetas pe selebra la dia

La Dia de Gustavo Adolfo (en svensce: Gustav Adolfsdagen) es selebrada en Sveria e alga otra paises a 6 novembre per recorda Re Gustavo Adolfo de Sveria, ci ia es matada a acel data (en la stilo vea de calendario) en 1632 a la Batalia de Lutzen en la Gera de Tredes Anios. La dia es un selebra de la bandera en Sveria e Suomi. En la pasada, la dia ia es selebrada con paradas con torxas e parlas patriota. Oji, cual resta es xef la come de un torta nomida per la re, con un releva de la re en xocolada o masapan a alta.

Seguente la calendrio gregorian, la re ia mori a 16 novembre, ma la calendrio julian ("la stilo vea") ia es ancora usada en Sveria protestante alora, e 6 novembre es usada ancora oji.

La Dia de Gustavo Adolfo ia es selebrada de la sentenio 19 temprana e ia deveni popular spesial pos la selebra de la aniversario 200 de la mori de la re en 1832. En Sveria, la dia es spesial selebrada en Gothenburg, cual ia es fundida par la re, ma ance en sites con tradisiones vea de educa como Uppsala, do el ia dona multe suporta finansial a la universia, e en sites do la militares ia es tradisional locada. Lo no es normal selebrada en Scania, la parte la plu sude de Sveria, car Scania ia es alora parte de Danmarc, e Gustavo Adolfo ia gera contra Danmarc.

Sjättenovembervägen ("La Rua de 6 Novembre"), un parte de la autovia vea de Göta en Älvsjö, es nomida per esta dia.

La dia es selebrada en Suomi de 1908 par la parlores svensce como la Dia Svensce, o la dia de erita suomi-svensce. En Esti, cual ia es un parte de Sveria como Suomi en la rena de Gustavo Adolfo, la dia es ance selebrada. En tota tre nasiones, 6 Novembre es la dia de nom per Gustavo Adolfo.