Devonian

La devonian es un periodo jeolojial de la paleozoica, estendente 60 milion anios de la fini de la silurian, 419.2 milion aaa, a la comensa de la carboniferosa, 358.9 milion aaa. Lo es nomida per la vila de Devon, England, do la rocas de esta periodo ia es prima studiada.

Jeolojia

La devonian ia es un periodo de multe ativia tetonica, cuando Laurusia (acc Euramerica) e Gonduana ia move a lunlotra. La planeta ia es dominada par la supracontinente de Gonduana a la sude, la continente de Sibir a la norde, e la formi de la continente peti de Laurusia entre los.

Laurusia ia es creada en la devonian temprana par la colide de Laurentia e Baltica, cual ia turna a la zono natural seca longo la tropico de la capra. En esta cuasi desertos, la letos de depone de arenito roja vea ia forma, rojida par la ematita (fero osidida) cual marca situas de secia.

Prosima la ecuator, la platas tetonica de Laurusia e Gonduana ia comensa encontra, comensante la grado temprana de la construi de la supracontinente Pangea. Esta ativia ia leva plu la Montes Apalatxian norde, e ia formi la Montes Caledonian en Britan e Scandinavia. Niveles de la mares ia es alta tra la mundo, e multe tera es su mares basa, do la organismes de resifes tropical ia abita. La mar Pantalasa, profonda e enorme, ia covre la resta de la planeta.

La devonian ia es un periodo relativa calda, e probable no ave cualce glasias. La gradiente termal de la ecuator a la polos no ia es tan grande como lo es oji. La clima ia es multe seca, spesial longo la ecuator. Reconstrui de la temperatur de la surfas de la mar tropical sujesta un valua promedia de 30ºC en la devonian temprana. Niveles de CO2 ia cade rapida tra la devonian. La forestas nova evoluida trae carbon de la atmosfera, cual ia es alora enterada en depones. Esta es refletada par la fria de devonian media de sirca 5ºC. La devonian tarda ia caldi a niveles egal a los de la devonian temprana.

Viventes

Pexes ia ateni multe diversia en esta periodo, cual resulta en la nometa per la devonian "la eda de pexes". La placodermos ia domina cuasi tota ambiente acual. La asendentes de tota vertebratos con cuatro gamas (tetrapodos) ia comensa ajusta a pasea sur tera, e sua pinas ladal e pelvisal forte ia evolui gradal a gamas. En la mares, selacos primitiva ia deveni plu cuantiosa ca en la silurian e ordovician tarda.

Estra la pexes, animales de mares ia es dominada par briozones, braciopodos, hederlidos, microconcides, e corales. Crinoides, cual sembla liles an si los es animales, ia es abundante. Trilobitos, la braciopodos moluscin, e la resifes grande de coral ia es ancora alga comun.

Entre la vertebratos, pexes armurida e sin mandibulas (ostracodermos) ia redui en diversia, en cuando pexes con mandibulas (gnatostomos) ia crese en mares e acua fresca. La placodermos armurida ia es comun en la devonian temprana e media, ma ia deveni estinguida en la devonian tarda, posible la resulta de compete per nuri contra otra spesies de pexes. Pexes cartilajosa e ososa temprana ia deveni plu diversa e ia ave un rol grande en la mares de la devonian. La prima jenera abundante de selacos (Cladoselache) ia apare en la devonian. La amonitos prima ia ance apare en la devonian temprana, sirca 400 milion aaa.

La prima estende sinifiante de vivente sur tera seca ia aveni en la devonian. Plantas vascular ia deveni sperde tra la tera, creante forestas estendeda cual ia covre la continentes. Per la devonian media, alga grupos de plantas ia evolui folias e radises vera, e per la fini de la periodo, la plantas cual produi semes ia apare. La vivente la plu grande sur tera a la comensa de esta periodo ia es la Prototxites, cual ia es posible la corpo frutinte de un fungo enorme, como un tapeto enrolada de epatica, cual ia ateni plu ca 8 metres e ia tori sur la plantas basa.

Artropodos teran variosa ia deveni ance bon fundida en la forestas: acaros, scorpiones, trigonotabides, e miriapodos. Ance la fosiles posible prima de insetos ia apare sirca 416 milion aaa, en la devonian temprana. La co-depende de insetos e plantas con semes cual indica un mundo reconosable ia ave sua jenese en la devonian tarda. Indicas de la tetrapodos la plu temprana es en la forma de fosiles en lagones basa.

Per la devonian media, forestas de planta primitiva cual sembla arboretas ia esiste: licofitos (moses), ecuisitos, filises, e gimnospermas primitiva ia evolui. La plu de esta plantas ia ave radises vera e folias, e algas ia es alta. La arbores prima ia apare en la devonian media, incluinte licofitos e cladoxylopsidos (filises leniosa). Esta apare rapida de tan multe plantas ave la nometa "la esplode devonian".

La "verdi" de la continentes ia ata como un poso de carbon, e la consentras de diosido de carbon ia cade. Esta ia pote fria la clima, e ia resulta en un aveni de estingui grande. Esta estingui, cual ia comensa sirca 375 milion aaa ia afeta sever viventes maral, matante tota placodermos e cuasi tota trilobitos. Braciopodos e la corales e alges de la resifes ia es ance afetada.

Per plu informa, vide la scala de edas jeolojial.

Galeria

Melocrinites nodosus spinosus un crinoide spinosa con tronceta, de la devonian media
Dunkleosteus, un de la placodermos la plu grande, de la devonian tarda
Depinta de Cladoselache fyleri, un selaco primitiva
Un reconstrui de la pex preistorial Pandericthys
La devonian ia marca la comensa de coloni estendente de tera par plantas
Equisetum telmateia (Ecuisito) moderna
Reconstrui de la planta Lepidodendron de fosiles
Reconstrui de Prototaxites, cual sembla un conifer
Un reconstrui de un aracnido Eophrynus prestvicii
La acaro microscopial Lorryia formosa moderna