Depresa

De Vicipedia
Jump to navigation Jump to search
Depinta par van Gogh de 1890: Om vea tristosa

La sindrom de depresa major, comun conoseda simple como depresa, es un maladia mental tecnical indicada par a min du semanas de mal umor cual es presente tra la plu de situas. Lo es comun acompaniada par autorespeta basa, la perde de interesa en ativias normal joiable, enerjia basa, e dole sin causa clar. Persones pote ance, a veses, ave credes falsa o vide o oia cosas ce otras no pote. Alga persones ave periodos de depresa separada par anios en cual los es normal; otras ave sintomes cuasi sempre presente. Depresa major pote afeta negativa la vive en labora, scola, o sosial. Lo pote afeta ance la dormi, la abituas de come, e sania jeneral. Entre du e sete persento de adultes con depresa major mori par suiside, e sirca 60% de persones ci suisidi ia ave depresa o otra maladia simil.

Psicolojistes e psiciatristes crede ce la causa de depresa major es un combina de fatores jenetical, sosial, e psicolojial. Fatores cual contribui a la tende per developa depresa major incluinte la istoria medical de la familia, cambias de vive major, alga medisines, problemes de sania cronica, e la malusa de drogas. Sirca 40% de la risca pare es relatada a jenetica. La diagnose de depresa major es fundida sur la reporta par la person de esperias problemosa e sur un esamina de state mental par un terapiste. On no ave un esamina laborerial per depresa major, an si esaminas laborerial pote elimina otra maladias posible con sintomes simil. Depresa major debe es difereda de triste, cual es un parte de vive normal e tipal min sever. An si alga instituis recomenda esaminas per depresa major, studias ia indica ce la usa costumal de esta esaminas ave un efeto minima sur deteta o trata.

Tipal, persones es tratada con consela e medisin antidepresante. Medisin pare es produosa, ma la efeto pote es sola produosa per persones con depresa sever. Lo es no clar si la medisines afeta la risca de suiside. Metodos comun de consela inclui terapia interpersonal e terapia cognisial. Si otra tratas no es produosa, la usa de terapia eletroconvulsante pote es atentada. Ospitali pote es nesesada en casos en cual un risca de peril a on mesma o a otras, e a veses pote aveni contra la desiras de la person.

La sindrom de depresa major ia afeta sirca 216 milion persones, o tre persento de la popla de la mundo en 2015. La persento de persones ci es afetada a un punto en sua vive varia de sete persento en Japan (Nion) a 21% en Frans. Proportios per vives intera es plu alta en la mundo developada (15%) comparada a la mundo developante (11%). Depresa causa la cuantia du de anios descapasida, pos dole de la dorso basa. La eda plu comun per la comensa es per persones en sua 20s e 30s. Femas es afetada sirca du veses plu comun ca mases. Persones depresada en la presente o la pasada es comun sosial manxada, cual pote grandi sua sufri.