Caso (gramatica)

De Vicipedia
Jump to navigation Jump to search

En gramatica, la caso de un nom o pronom es un cambia de la forma de la parola per indica sua rol en la formula, proposa o frase, en relata a sua parola xef. Lo parteni spesial a la relata de nomes e pronomes en un frase a la verbo xef de la frase. Lo es un de tre varias per indica roles: la otras es la loca de la parola e la usa de preposadas o posposadas. Linguas cual usa casos ave comun un ordina libre de parolas, car la roles de nomes no depende de la loca de la parola en la frase.

La studia de casos es multe antica. Filosofistes de India antica, Elas antica, e la Impero Roman, entre otras, ia scrive sur la sujeto. La oto casos istorial de la linguas indo-european segue a su. (La esemplos no es bon, car elefen no usa casos, ma los es donada per sujesta la sinifias.)

  • 1. nominativa (o caso de sujeto) – nos vade a la boteca
  • 2. acusativa (o caso de ojeto) – la vendor recorda nos
  • 3. dativa (o caso de reseta) – la vendor dona el a nos
  • 4. ablativa (o caso de orijina) – el parti de la stasion
  • 5. jenitiva (o caso de posese) – esta es mea libro
  • 6. vocativa (o caso de clama) – Joan, tu es oce?
  • 7. locativa (o caso de loca) – nos abita en Xina
  • 8. strumental (o caso de usa) – nos colpa el con un martel

Bon esemplos es de latina. Estas es la varias de nauta (singular), la parola latina per "marinor":

  • 1. nauta (nominativa) – la marinor (como sujeto) (pe nauta ibi stat – la marinor sta ala)
  • 2. nautae (jenitiva) – de la marinor (pe nomen nautae est Claudius – la nom de la marinor es Claudio)
  • 3. nautae (dativa) – a/per la marinor (pe nautae donum dedi – me dona un donada a la marinor)
  • 4. nautam (acusativa) – la marinor (como ojeto) (pe nautam vidi – me ia vide la marinor)
  • 5. nautā (ablativa) – de/con/en/par la marinor (pe sum altior nautā – me es plu alta ca la marinor).

En alga linguas (pe euscara e multe linguas american orijinal), on no usa la nominativa o la acusativa, ma du otra casos en loca:

  • ergativa (caso de afeta) – la sujeto de verbos transitiva
  • asoluta (caso asoluta) – la sujeto de verbos nontransitiva e la ojeto de verbos transitiva

Alga linguas ave multe plu casos. Per esemplo, suomi ave 15 e magiar ave 18. La casos de suomi inclui la seguentes. (Nota ce la definis no covre tota usas de cada caso.)

  • 1. nominativa (caso de sujeto)
  • 2. jenitiva (caso de posese)
  • 3. acusativa (caso de ojeto)
  • 4. partitiva (caso de ojeta partal) – como acusativa, ma referente a sola un parte de la ojeto
  • 5. inesiva (caso de interna) – per indica un loca interna
  • 6. elativa (caso de sorti) – per indica move de la interna
  • 7. ilativa (caso de entra) – per indica move a la interna
  • 8. adesiva (caso de prosima) – per indica un loca prosima
  • 9. ablativa (caso de orijina) – per indica move de un loca
  • 10. alativa (caso de destina) – per indica move a un loca
  • 11. esiva (caso de similia) – simil a la preposada "como"
  • 12. translativa (caso de cambia) – per indica cambia a alga cosa
  • 13. strumental (caso de usa) – simil a la preposada "con" regardante la usa de un util
  • 14. abesiva (caso de asenta) – simil a la preposada "sin"
  • 15. comitativa (caso de acompania) – simil a la preposada "con" regardante la presentia de otras

Magiar ave nove casos clar de loca e state:

  Interna Surfas Lado
Loca 1. inesiva
-ban/-ben
lakásban
en la aparte
2. superesiva
-on/-en/-ön/-n
lakáson
sur la aparte
3. adesiva
-nál/-nél
lakásnál
a/asta la aparte
Move a 4. ilativa
-ba/-be
lakásba
move en la aparte
5. sublativa
-ra/-re
lakásra
move sur la aparte
6. alativa
-hoz/-hez/-höz
lakáshoz
move a la aparte
Move de 7. elativa
-ból/-ből
lakásból
move estra la aparte
8. delativa
-ról/-ről
lakásról
move "de sur" la aparte
9. ablativa
-tól/-től
lakástól
move de la aparte

On pote vide como la sufisas a supra ia evolui cisa, par nota como -b- es en 1, 4 e 7 (do lo pare indica la idea de la interna), e -r- es en 5 e 8 (la surfas), e como -a/-e es en 4 e 5 (move a), e -ól/-ől es en 7, 8, e 9 (move de). Natural, otras de la sufisas a supra no conveni a la model.

Plu, magiar ave esta casos:

Alga linguistes sujesta ce linguas como suomi e magiar no ave vera casos, o a la min no tan multe casos como indicada asi. La sufisas es tan coerente ce los sujesta ce los es plu como cliticas en linguas indo-european, per dise posposadas no plu ca partal asorbeda en la radis. Ma la plu de linguistes trova ce la idea de casos opera bon con esta linguas ance.