Canta de Roland

De Vicipedia
Jump to navigation Jump to search
La Canta de Roland
La Chanson de Roland
Grandes chroniques Roland.jpg
Oto senas de la Canta de Roland, en un manoscrito luminada.
Autor: Turold
Pais: Normandia
Lingua: Anglo-normande

La Canta de Roland (franses: La Chanson de Roland) es un poesia epica fundida sur la batalia de Roncesvalles en 778, en la rena de Carlo la grande. Lo es la obra la plu antica de leteratur franses cual ia survive asta oji, e lo esiste en versiones variosa en manoscritos diferente, atestante sua popularia enorme entre la sentenios 12 e 14.

On dati sua composa a la periodo entre 1040 e 1115: un varia temprana ia comensa sirca 1040, con ajuntas e alteras asta sirca 1115. La testo final ave sirca 4000 linias de poesia. Esta epica es la prima esemplo – e, con la Poesia de Mea Cid, un de la esemplos la plu eselente – de la chanson de geste (canta de atas eroin), un forma leteratural cual ia flori entre la sentenios 11 e 15 e ia selebra atas lejendal.

Manoscritos e data[edita | edita la fonte]

An si lo descrive avenis en la eda carolingian, lo ia es scriveda a tempo multe plu tarda. Nove manoscritos survive de la Canta de Roland en franses vea. La plu vea de esta manoscritos es tenida a la Biblioteca Bodleian en Oxford. Esta ia orijina entre 1129 e 1165 e ia es scriveda en anglonormande.

Eruditas estima ce la poesia ia es scriveda, cisa par un poesiste nomida Turold, entre sirca 1040 e 1115, e ce la plu de la alteras ia es ja fada sirca 1098. Algas favore un data plu temprana, car esta permete ce on dise ce la poesia ia es inspirada par la campanias castelian de la desenio de 1030, e ce la poesia ia es un influe major en la Crusada Prima a pos. Los ci prefere un data plu tarda segue lo cual los interprete como referes corta en la poesia a avenis de la Crusada Prima.

En la poesia, la terma d'oltre mer o l'oltremarin aveni a tre veses en refere a muslimes nomimda ci ia veni de oltre mer per combate en Espania e Frans. Oltre mer (outremer en franses moderna) es un terma franses nativa cual sinifia "ultra mar" en elefen. La nom ia es comun usada par la crusadores per Filastin.

On no pote interprete la apare de esta terma en la poesia como un influe de la Crusadas; par contrasta, sua modo de usa en la poesia, en cual lo indica mera un pais muslim, indica ce la autor de la poesia no ia conose la Crusadas, e ce la terma ia esiste en franses ante la comensa de la crusadas. On judi ce la plu de la poesia ia orijina ante la Crusadas (cual ia comensa en 1098), ma on ave un pico de pasajes do la demanda resta esce los ia es ajuntas tarda, fada corta pos la comensa de la Crusadas.

Pos la descovre de du manoscritos en 1832 e 1835, la Canta de Roland ia es reconoseda como la epica nasional de Frans cuando on ia publici un edita en 1837.